দেশৰ দহজন জনপ্রিয় মুখ্যমন্ত্রীৰ তালিকাত হিমন্ত বিশ্ব শর্মা

দেশৰ সর্বাধিক জনপ্রিয় মুখ্যমন্ত্রীসকলৰ তালিকাত স্থান লাভ কৰিছে ৰাজ্যৰ মুখ্যমন্ত্রী ড০ হিমন্ত বিশ্ব শর্মাই৷ ৰাষ্ট্রীয় আলোচনী ইণ্ডিয়া টুডেই চলোৱা এক সমীক্ষা অনুসৰি দেশৰ দহজন জনপ্রিয় মুখ্যমন্ত্রীৰ ভিতৰত সপ্তম স্থানত আছে অসমৰ মুখ্যমন্ত্রীজন৷ আনহাতে, বিজেপি শাসিত ৰাজ্যসমূহৰ মুখ্যমন্ত্রীসকলৰ ভিতৰত প্রথম স্থানতে আছে ড০ শর্মা৷
সমীক্ষাটোৰ মতে, দেশৰ ভিতৰতে সর্বাধিক জনপ্রিয় মুখ্যমন্ত্রী হিচাপে বিবেচিত হৈছে ওড়িষাৰ মুখ্যমন্ত্রী নবীন পাটনায়ক৷ ৭১ শতাংশ লোকে পাটনায়কৰ কাম-কাজক লৈ সন্তুষ্টি প্রকাশ কৰিছে৷
আনহাতে, দ্বিতীয় স্থানত আছে মমতা বেনার্জী৷ ৬৯.৯ শতাংশৰে জনপ্রিয় মুখ্যমন্ত্রীৰ দ্বিতীয় স্থান অধিকাৰ কৰিবলৈ সক্ষম হৈছে পশ্চিম বংগৰ মুখ্যমন্ত্রীগৰাকীয়ে৷ ৬৭.৫ শতাংশৰে তৃতীয় স্থানত আছে তামিলনাডুৰ মুখ্যমন্ত্রী এম কে ষ্টেলিন৷ ইয়াৰ পাছতে চতুর্থ স্থানত আছে মহাৰাষ্ট্রৰ মুখ্যমন্ত্রী উদ্ধৱ থাকৰে, পঞ্চম স্থানত কেৰালাৰ মুখ্যমন্ত্রী পি বিজায়ন আৰু ষষ্ঠ স্থানত আছে দিল্লীৰ মুখ্যমন্ত্রী অৰবিন্দ কেজৰিৱাল৷
ইফালে ৫৬.৬ শতাংশ লোকে ড০ হিমন্ত বিশ্ব শর্মাৰ কাম-কাজক লৈ সন্তুষ্টি ব্যক্ত কৰাত তেওঁ এই তালিকাত সপ্তম স্থান লাভ কৰিছে৷