বিশ্ববিদ্যালয়সমূহৰ প্ৰাথমিক দায়িত্ব হৈছে গুণগত মান আৰু অত্যাধুনিক গৱেষণাৰ জৰিয়তে নতুন জ্ঞান সৃষ্টি কৰা, আৰু সমাজত স্পষ্ট আৰু বহনক্ষম প্ৰভাৱ পেলোৱা। এটা জাতিৰ সামাজিক পুঁজিলৈ অৰিহণা যোগোৱাৰ জৰিয়তে, সামাজিক বিষয়সমূহৰ নতুন দৃষ্টিভংগীক উদ্দীপিত কৰাৰ জৰিয়তে, বা ৰাজহুৱা বিতৰ্ক আৰু নীতি নিৰ্ধাৰণৰ বিষয়ে অৱগত কৰাৰ জৰিয়তে গৱেষণাৰ সামাজিক সুবিধা আছে, এই কথা কয় অধ্যাপক তথা NEHU বিশ্ববিদ্যালয়ৰ জৈৱ প্ৰযুক্তি বিভাগৰ মুৰব্বী ড০ এছ আৰ যোশীয়ে। তদপুৰি PHD ৰ নবাগত ছাত্ৰ ছাত্ৰীসকলক সম্বোধন কৰি আজি মেঘালয়ৰ বিজ্ঞান আৰু প্ৰযুক্তিবিদ্যা বিশ্ববিদ্যালয়ৰ গৱেষণা বিভাগে আয়োজন কৰা এক অৰিয়েণ্টেচন কাৰ্যসূচীত তেজপুৰ বিশ্ববিদ্যালয়ৰ সমাজ বিজ্ঞান বিভাগৰ মুৰব্বী অধ্যাপক ৰবীন ডেকাইও অংশগ্ৰহণ কৰে । অৰিয়েণ্টেচনত ১০০ৰো অধিক নবাগত PHD ছাত্ৰ ছাত্ৰীৰ লগতে ফেকাল্টী ছুপাৰভাইজৰে অংশ গ্ৰহণ কৰে।
গৱেষণাৰ বাবে প্ৰস্তুতি কেনেকৈ আৰম্ভ কৰিব পাৰি সেই সম্পৰ্কে পণ্ডিতসকলক সম্বোধন কৰি ড০ এছ আৰ যোশীয়ে কয় যে প্ৰথম ছমাহৰ ভিতৰত PHD ছাত্ৰ ছাত্ৰীৰ মূল প্ৰেৰণা হব লাগিব তেওঁৰ গৱেষণাৰ জ্ঞানৰ ক্ষেত্ৰখন সমৃদ্ধ কৰা। তেওঁ কয় যে মৌলিক গৱেষণা জ্ঞান বৃদ্ধিৰ আৰু মানৱ, পশু আৰু উদ্ভিদ ৰাজ্যৰ কল্যাণৰ বাবে কৰা হয়, ই বাণিজ্যিক সম্ভাৱনাৰ বাবে নহয়। গৱেষণাৰ তাৎপৰ্য্যৰ বিষয়ে কৈ তেওঁ কয় যে প্ৰয়োজনীয় তথ্য সংগ্ৰহ, পৰিৱৰ্তন, জীৱন ধাৰণৰ মানদণ্ড উন্নত কৰা, সত্য জনা, আমাৰ ইতিহাস অন্বেষণ, কলা, প্ৰযুক্তি বিকাশ আৰু উৎপাদনশীলতা বৃদ্ধিৰ বাবে গৱেষণা কৰা হয়। তেওঁ লগতে কয় যে ইয়াৰ তাৎক্ষণিক প্ৰভাৱ নাথাকিবও পাৰে কিন্তু সময়ৰ লগে লগে গৱেষণাই উদ্ভাৱনত অপৰিসীম মূল্য সংযোজন কৰিব পাৰে। প্ৰয়োগমূলক গৱেষণা হৈছে সমস্যামুখী আৰু সমস্যা সমাধানকাৰী গৱেষণা, যেনে শেহতীয়াকৈ কৰোনা ৰোগৰ ভেকচিনৰ আৱিষ্কাৰ। তেওঁ গুণগত আৰু পৰিমাণগত গৱেষণা সম্পৰ্কেও বিতংভাৱে ব্যাখ্যা কৰে।
ইয়াৰ পূৰ্বে আদৰণি ভাষণ দিয়ে ইউ এছ টি এমৰ উপাচাৰ্য অধ্যাপক জি ডি শৰ্মাই। অনুষ্ঠানৰ অন্তত ধন্যবাদ জ্ঞাপন কৰে ড০ বি.কে. দাস, ইউ এছ টি এমৰ প্ৰ’ ভাইচ চান্সেলৰ।
