চৰকাৰে টেট শিক্ষকক মাহে ৫০ হাজাৰ টকাতকৈ বেছি দৰমহা দিব নোৱাৰে বুলি মুখ্যমন্ত্ৰীয়ে জনাইছে৷ বেছি দৰমহা পাবৰ বাবে মুখ্যমন্ত্ৰীয়ে নিবনুৱাকলক ব্যক্তিগত খণ্ডত সংস্থাপন বিচাৰিবলৈও পৰামৰ্শ দিছে৷ আনহাতে তেওঁৰেই চৰকাৰে সংস্থাপনহীন নিবনুৱাৰপৰাই চাকৰিৰ আবেদন মাছুলৰ নামত সংগ্ৰহ কৰিব খুজিছে বহু কোটি টকা।
উল্লেখ্য যে, শনিবাৰে অসম চৰকাৰে তৃতীয় আৰু চতুৰ্থ বৰ্গৰ ২৬৪৪১টা পদৰ বিজ্ঞাপন প্ৰকাশ কৰিছে ৷ ইয়াৰে তৃতীয় বৰ্গৰ ১৩১৪১টা আৰু চতুৰ্থ বৰ্গৰ ১৩৩০০ টা। এয়া এক লাখ চাকৰি দিম বুলি প্ৰতিশ্ৰুতি দিয়া চৰকাৰৰ এক ইতিবাচক পদক্ষেপ ৷ কিন্তু একাউণ্টেন্ট, কেছিয়াৰ, এলডিএ, চালক আদি পদৰ বাবে প্ৰকাশ কৰা এই বিজ্ঞাপনত প্ৰকাশ পাইছে যে পদ অনুসৰি চৰকাৰে আবেদন মাচুল ৩৫০ টকা, ২৫০ টকা, ২০০ টকা আৰু ১৫০ টকাকৈ সংগ্ৰহ কৰা হ’ব৷ দৈনিক অসমত প্ৰকাশিত প্ৰতিবেদন মতে যদি ২৬৪৪১টা পদৰ বিপৰীতে যদি ডেৰ লাখ নিবনুৱায়ো আবেদন কৰে তেন্তে চৰকাৰে সংগ্ৰহ কৰিব বৃহৎ ধন৷ গড়ে ২৫০ টকাকৈ মাচুল ধৰিলে ডেৰ লাখ নিবনুৱাৰ পৰা চৰকাৰে সংগ্ৰহ কৰিব প্ৰায় ৪০ কোটি টকা ৷
উল্লেখ্য যে চৰকাৰে পূৰ্বেও বহু পদৰ বিজ্ঞাপন দি নিবনুৱাৰ পৰা মাচুল সংগ্ৰহ কৰিছে ৷ কিন্তু বহু পদৰ সাক্ষাৎকাৰ অনুষ্ঠিত কৰি নিযুক্তিৰ তালিকা প্ৰকাশ কৰা নাই ৷ এপিডিচিএলৰ পদৰ পৰীক্ষা অনুষ্ঠিত কৰিও বাতিল কৰা হৈছে ৷ বিদেশী ন্যায়াধিকৰণৰ ১৭০০ পদৰ সাক্ষাৎকাৰ অনুষ্ঠিত কৰিও নিযুক্তি দিয়া নহ’ল ৷
মুখ্যমন্ত্ৰীয়ে এইবুলি স্পষ্টীকৰণ দিছে যে পৰীক্ষা দিয়াৰ প্ৰমাণ হিচাপেহে মাচুল সংগ্ৰহ হৈছে। প্ৰমাণ ৰাখিবলৈ সামান্য পৰিমানৰ ধন ল’লেও হ’লহেঁতেন৷ মুখ্যমন্ত্ৰীয়ে ৰিলায়েন্সৰ চাকৰিৰ বাবে নিবনুৱাক সাজু হ’বলৈ কোৱাৰ লগতে চৰকাৰী কৰ্মচাৰীসকলক বেছি দৰমহা দিব নোৱাৰে বুলি হাত দাঙি দিয়াৰ পাছতো নিবনুৱাৰ পৰাই মাচুলৰ নামত কোটি কোটি টকা সংগ্ৰহ কৰাটোৱে চৰকাৰৰ বিত্তীয় অৱস্থা টনকিয়াল নোহোৱাটোকে বুজাইছে বুলি সচেতন মহলে কৈছে।
