দীপাৱলী উপলক্ষে বৰঝাৰ বিমানকোঠত যাত্ৰীৰ বাবে বিশেষ মনোৰঞ্জনমূলক কাৰ্যসূচীৰ ব্যৱস্থা কৰা হৈছ ।
শাৰদীয় শ্ৰী শ্ৰী দুৰ্গা পূজা শেষ হোৱাৰ পাছত দেশৰ আন প্ৰান্তৰ দৰে অসমতো আৰম্ভ হৈছে আগন্তক দীপাৱলীক আদৰাৰ বাবে ব্যাপক তৎপৰতা ।
বিশেষকৈ কভিডৰ বাবে দুটা বছৰৰ বিৰতিৰ অন্তত উদযাপিত হবলগীয়া দীপাৱলীক আদৰিবলৈ যাবতীয় প্ৰস্তুতি আৰম্ভ কৰা পৰিলক্ষিত হৈছে সাধাৰণ ৰাইজৰ মাজত । ইফালে অসমৰ আন প্ৰান্তৰ দৰে গুৱাহাটীৰ পশ্চিম প্ৰান্তৰ বৰঝাৰস্থিত লোকপ্ৰিয় গোপীনাথ বৰদলৈ আন্তঃৰাষ্ট্ৰীয় বিমানকোঠতো আগন্তক দীপাৱলী উপলক্ষে বিমান যাত্ৰীৰ বাবে ১৫ অক্টোবৰৰ পৰা কেতবোৰ মনোৰঞ্জনমূলক কাৰ্যসূচী গ্ৰহণ কৰা পৰিলক্ষিত হৈছে ।
এই কাৰ্যসূচীৰ অহা ৩০ অক্টোবৰত সামৰণি পৰিব । এই সন্দৰ্ভত বিমানকোঠৰ মুখপাত্ৰই জানিবলৈ দিয়া মতে, গুৱাহাটী আন্তঃৰাষ্ট্ৰীয় বিমানকোঠৰ কৰ্তৃপক্ষই বিগত সময়চোৱাত মহাপুৰুষ দুজনাৰ তিথি , বিহুকে ধৰি অসমীয়া জাতিৰ সকলো সংস্কৃতি সুন্দৰকৈ স্থানীয় ভাৱে থলুৱা শিল্পী সকলৰ সহযোগিতাত উদযাপন কৰি আহিছে ।
তেনেদৰে ১৫ দিনীয়া কাৰ্যসূচীৰে আৰম্ভ হোৱা দীপাৱলীৰ লগত সংগতি ৰাখি যাত্ৰীৰ বাবে বিমানকোঠৰ ভিতৰত বজাৰ – সমাৰ কৰাৰ সুবিধাৰ্থে গ্ৰহণ কৰা হৈছে কেতবোৰ বিশেষ ব্যৱস্থা । এই ব্যৱস্থাৰ অধীনত এঘণ্টাৰ ভিতৰত খাদ্য বা বেভাৰেজ সামগ্ৰী যদি যাত্ৰীয়ে ২,৫০০ টকাতকৈ অধিক টকাৰ সামগ্ৰী ক্ৰয় কৰে তেন্তে সেই যাত্ৰীয়ে লাভ কৰিব এটা বেগ । তেনেকৈ বিমানকোঠৰ ঘঁৰুৱা নিৰাপত্তা মণ্ডল এলেকাত দীপাৱলী উপলক্ষে সজাই পৰাই তোলা হৈছে । যত যাত্ৰীৰ বাবে কেতবোৰ মনোৰঞ্জনমূলক ব্যৱস্থা তথা কাৰ্যসূচী গ্ৰহণ কৰা হৈছে বুলি বিমানকোঠৰ মুখপাত্ৰই জানিবলৈ দিছে ।
