মহানগৰীত থাকিও চিটিবাছ সেৱাৰ পৰা বঞ্চিত পশ্চিম গুৱাহাটীৰ ৰাইজ ।
৩৬ আৰু ৩৮ নং সেৱাৰ বাছ খানামুখ , ধাৰাপুৰলৈ চলাচল কৰাৰ দাবী গুৱাহাটীবাসীৰ । গুৱাহাটীৰ ৰাইজৰ বাবে এক প্ৰকাৰ নষ্টালজিয়া আৰু ইতিহাসত পৰিণত হৈছে মহানগৰীৰ চিটিবাছ সেৱা ।
অথচ প্ৰায় দুটা দশক আগলৈকে নিশা ৯ বজালৈকে চিটিবাছ চলাচল কৰিছিল পশ্চিম গুৱাহাটীৰ ৰাণী , মাজিৰগাঁও , আজাৰাৰ ভি আই পি লৈকে । বিশেষকৈ ৰাজ্য চৰকাৰৰ ৰাজহুৱা খণ্ডৰ অসম ৰাজ্যিক পৰিবহণ নিগমৰ চিটিবাছ সেৱাৰ উপৰিও ব্যক্তিগত খণ্ডৰ চিটিবাছ সেৱাই ৰাণী , আজাৰা ভি আই পি , মাজিৰগাঁওকে ধৰি পশ্চিম গুৱাহাটীৰ এক বিস্তীৰ্ণ অঞ্চল সামৰি লৈছিল । ফলত অতি সহজে পশ্চিম গুৱাহাটীৰ ৰাইজে গুৱাহাটী মহানগৰীৰ বিভিন্ন প্ৰান্তলৈ পোনপটীয়াকৈ অহা যোৱা কৰিব পাৰিছিল ।
কিন্ত কালক্ৰমত ২০০১ – ০২ চন মানৰ লাহে লাহে ৰাজহুৱা খণ্ডৰ পৰিবহণ নিগমৰ লগতে ব্যক্তিগত খণ্ডৰ চিটিবাছ সেৱা কোনো কাৰণ নোহোৱাকৈ বন্ধ হয় ।
তাৰ ঠাই লবলৈ আৰম্ভ কৰে মেজিককে ধৰি তেনে ধৰণৰ চাৰিচকীয়া লঘু বাহন সমূহে ।
কিন্তু এই লঘু বাহন তুলনামূলকভাৱে অধিক খৰচী হোৱা আৰু মিৰ্জা , বিজয়নগৰকে ধৰি দক্ষিণ কামৰূপৰ বিভিন্ন প্ৰান্তৰ পৰা অহা এই বাহন কেৱল জালুকবাৰী বা আদাবাৰীলৈকে চলাচল কৰে । ফলত আদাবাৰীৰ পৰা মাত্ৰ এক কিলোমিটাৰ দূৰত্বৰ মালিগাঁওলৈ কোনো লোক ধাৰাপুৰ বা খানামুখৰ পৰা অহাযোৱা কৰিব লাগিলেও মাত্ৰ ছয় – সাত কিলোমিটাৰ ব্যৱধানত দুখনকৈ বাহন সলাব লগীয়া হয় । এনেকৈ অহাযোৱা কৰিবলগীয়া হোৱাৰ ফলত পশ্চিম গুৱাহাটীৰ ৰাইজে ভাড়াৰ নামত অযথা অধিক খৰশ্ৰান্ত আৰু অধিক সময়ৰ অপচয় কৰিবলগীয়া হৈছে ।
এইখিনীতে উল্লেখযোগ্য যে, ৰাইজৰ বহুদিনীয়া দাবীৰ প্ৰতি সঁহাৰি জনায় ২০১৬ – ১৭ চনত কামৰূপ মহানগৰ জিলাৰ তদানীন্তন উপায়ুক্ত তথা আঞ্চলিক পৰিবহণ প্ৰাধিকৰণৰ অধ্যক্ষ ডঃ এম অংগমুথুৱে তেতিয়া নাৰেংগীৰ পৰা লংকেশ্বৰলৈ চলাচল কৰি থকা ৬ নং সেৱাৰ চিটিবাছ সমূহ লংকেশ্বৰৰ পৰা মাত্ৰ এক কিলোমিটাৰ নিলগৰ খানামুখলৈ চলাচল কৰা সন্দৰ্ভত ব্যৱস্থা গ্ৰহণ কৰিছিল । কিন্তু এটা বছৰ চলাচল কৰাৰ পাছত এই সেৱা প্ৰায় বন্ধ হৈ পৰে ।
আনহাতে পৰৱৰ্তী সময়ত কামৰূপ মহানগৰ জিলাৰ আঞ্চলিক পৰিবহণ প্ৰাধিকৰণৰ ফালৰ পৰা গুৱাহাটীৰ চিটিবাছ সেৱাক ন – ৰূপ দিয়াৰ লক্ষ্যৰে মহানগৰীৰ চিটিবাছ সেৱাৰ পথ সমূহৰ নম্বৰৰ ব্যাপক সালসলনি কৰাৰ লগতে ৰাইজৰ সুবিধাৰ্থে নতুন নতুন অঞ্চলক সামৰি লোৱাৰ নিৰ্দেশনা জাৰি কৰা হয় । সেই অনুসৰি ৩৬ নং সেৱাৰ চিটিবাছ সমূহক নাৰেংগীৰ পৰা চানমাৰী হৈ খানামুখলৈ চলাচল কৰা আৰু ৩৮ নং সেৱাৰ চিটিবাছ সমূহক বশিষ্টৰ পৰা ধাৰাপুৰ চাৰিআলিলৈকে চলাচল কৰিবলৈ নিৰ্দেশনা জাৰি কৰা হয় । কিন্তু আন বহু চৰকাৰী নিৰ্দেশৰ দৰে সেই নিৰ্দেশনাও পাহৰনিৰ গৰ্ভলৈ গতি কৰাত পুনৰ দুখলগাকৈ চিটিবাছ সেৱাৰ পৰা বঞ্চিত হব লগা হৈছে পশ্চিম গুৱাহাটীৰ বৃহত্তৰ অঞ্চলৰ ৰাইজ ।
৩৬ আৰু ৩৮ নম্বৰৰ চিটিবাছৰ বেছিভাগেই খানামুখ বা ধাৰাপুৰলৈ অহাৰ সলনি জালুকবাৰীলৈকেহে চলাচল কৰে । ইফালে পশ্চিম গুৱাহাটী ছাত্ৰ সন্থা , পশ্চিম গুৱাহাটী সাংবাদিক সন্থা , অসম জাতীয়তাবাদী যুৱ ছাত্ৰ পৰিষদৰ পশ্চিম গুৱাহাটী শাখা , অগপৰ পশ্চিম গুৱাহাটী বিধান পৰিষদকে ধৰি বিভিন্ন দল – সংগঠনে কামৰূপ মহানগৰ জিলাৰ আঞ্চলিক পৰিবহণ প্ৰাধিকৰণ কৰ্তৃপক্ষক ৩৬ আৰু ৩৮ নম্বৰ সেৱাৰ চিটিবাছ সমূহক খানামুখ – ধাৰাপুৰলৈ চলাচল কৰাৰ ক্ষেত্ৰত তৎপৰ ব্যৱস্থা গ্ৰহণ কৰিবলৈ দাবী জনাইছে । আনকি দল সংগঠন সমূহে বিগত দুটা দশক পূৰ্বৰ দৰে আজাৰা হৈ ৰাণীলৈ আৰু পলাশবাৰী হৈ মিৰ্জালৈ চিটিবাছ সেৱাৰ সম্প্ৰসাৰণ কৰিবলৈ দাবী জনাইছে ।
