কাছাৰত কালি পুৱতি নিশা এক এনকাউণ্টাৰৰ ঘটনা সংঘটিত হৈছে৷ আৰক্ষীৰ গুলীত আহত কুখ্যাত ডকাইত চামিম আহমেদ লস্কৰ। ভৰিত গুলীবিদ্ধ হৈ বৰ্তমান SMCHত ভৰ্তি হৈ আছে ডকাইত জন৷
জানিব পৰা মতে, যোৱা কেইদিনমান পূৰ্বে কাছাৰ আৰক্ষীৰ হাতত গ্ৰেপ্তাৰ হৈছিল চামিম আহমেদ। নিশা কুখ্যাত ডকাইত চামিম আহমেদক লগত লৈ কাছাৰ আৰক্ষী শিলচৰ আউলিয়াটিল্লাত গৈছিল ডকাইতি কৰা সামগ্ৰী উদ্ধাৰ কৰিবলৈ ৷
জানিব পৰা মতে, আৰক্ষীক আক্ৰমণ চলাই ডকাইত চামিমে পলাবলৈ চেষ্টা কৰাত আৰক্ষীয়ে তেওঁৰ ভৰিত গুলীবৰ্ষণ কৰে। পিছত গুলীবিদ্ধ ডকাইত চামিম আহমেদক আৰক্ষীয়ে শিলচৰ মেডিকেল কলেজ হাস্পতালত ভৰ্তি কৰোৱাই ৷ আৰক্ষীৰ গুলীত আহত ডকাইতজনৰ ঘৰ সোনাই সমষ্টিৰ কচুদৰমত ৷ চুৰি, ডকাইতি সহ বিভিন্ন অপৰাধজনিত ঘটনাৰ লগত জড়িত থকাৰ অভিযোগত কাছাৰৰ বিভিন্ন থানাত চামিমৰ বিৰুদ্ধে গোচৰ ৰুজু হৈ আছে।
