আজি ধেমাজি জিলাৰ জোনাইত ড্ৰাগছ সৰবৰাহকাৰীলৈ আৰক্ষীৰ গুলী। জোনাইত আৰক্ষীৰ গুলীত আহত হৈছে ড্ৰাগছ সৰবৰাহকাৰী বিশ্বজিত কাৰ্দং।
আজি দুপৰীয়া বিশেষ সূত্ৰৰ পম খেদি জোনাই বজাৰ কলেজ ৰোডত আৰক্ষীয়ে ড্ৰাগছ বিৰোধী অভিযান চলায়। জোনাই মহকুমা আৰক্ষী বিষয়া ভাৰ্গৱমণি দাস আৰু জোনাই থানাৰ ভাৰপ্ৰাপ্ত আৰক্ষী বিষয়া নেত্ৰকমল শইকীয়াৰ নেতৃত্বত চলোৱা অভিযানৰ সময়ত জোনাই বজাৰত ড্ৰাগছসহ বিশ্বজিত কাৰ্দঙক আটক কৰে।
কিন্তু আৰক্ষীৰ বেহু ফালি পলাবলৈ চেষ্টা কৰাৰ সময়ত আৰক্ষীৰ গুলিত আহত হয় ড্ৰাগছ সৰবৰাহকাৰী বিশ্বজিত কাৰ্দং। আৰক্ষীয়ে আহত কাৰ্দঙক জোনাই ব্লক প্ৰাথমিক স্বাস্থ্য কেন্দ্ৰত প্ৰাথমিক চিকিৎসা কৰি ধেমাজি অসামৰিক চিকিৎসালয়লৈ প্ৰেৰণ কৰে। বিশ্বজিত কাৰ্দঙৰ ঘৰ জোনাইৰ মধ্যপুৰত বুলি জানিব পৰা গৈছে।
ড্ৰাগছ সৰবৰাহকাৰীজনৰ পৰা প্ৰায় ৭০ গ্ৰাম ড্ৰাগছ উদ্ধাৰ কৰাৰ লগতে নগদ প্ৰায় ১২ হেজাৰ টকা আৰু পৰিচয় পত্ৰ আৰক্ষীয়ে উদ্ধাৰ কৰে। আনহাতে, আৰক্ষীয়ে জানিবলৈ দিয়া মতে ২০২০ চনটো বিশ্বজিত কাৰ্দঙে ড্ৰাগছ সৰবৰাহৰ গোচৰত গ্ৰেপ্তাৰ হৈ জেললৈ গৈছিল।
