নগাঁও চৰকাৰী উচ্চতৰ মাধ্যমিক বালক বিদ্যালয়ৰ নৱম শ্ৰেণীৰ ছাত্ৰ সমীৰণ দাস আৰু কিশোৰ দাসৰ সন্ধান ওলাল৷ দুয়োজন ছাত্ৰ বুধবাৰৰ পৰা সন্ধানহীন হৈ আছিল ৷
বৃহস্পতি বাৰে ছাত্ৰ দুজনক নগাঁও আৰক্ষী আৰু ৰেল আৰক্ষীৰ যুটীয়া অভিযানত নিউ জলপাইগুৰিৰ পৰা উদ্ধাৰ কৰা হৈছে৷ অবধ আসাম এক্সপ্ৰেছত যাত্ৰা কৰি থকা অৱস্থাত দুয়োকে উদ্ধাৰ কৰা হৈছে ৷ বৰ্তমান নিউ জলপাই গুৰি ৰেল আৰক্ষীৰ জিম্মাত আছে ছাত্ৰ দুজন ৷ তাৰ পৰা ছাত্ৰ দুজনক আনি সোধপোচ কৰিব নগাঁও আৰক্ষীয়ে৷
উল্লেখ্য যে, বুধবাৰে দুয়োজন ছাত্ৰৰ হিন্দী পৰীক্ষা আছিল৷ সময়তকৈ আগতে পৰীক্ষা দি দুয়োজন ছাত্ৰ পৰীক্ষা গৃহৰ পৰা দুয়ো ওলাই গৈছিল৷ চহৰ খনৰ ডিমৰুগুৰিৰ ছাত্ৰ দুগৰাকী সন্ধানহীন হোৱাৰ পিছত পৰিয়ালৰ লোকে নগাঁও সদৰ আৰক্ষী থানাত এজাহাৰ দাখিল কৰিছে৷ এজাহাৰ দাখিলৰ পিছত নগাঁও সদৰ থানাৰ আৰক্ষী বিষয়া মনোজ ৰাজবংশীয়ে তদন্ত কৰি ছাত্ৰ দুজনক আৰক্ষীয়ে উদ্ধাৰ কৰিবলৈ সক্ষম হয় ৷
