দক্ষিণ কামৰূপৰ বিভিন্ন অঞ্চল, বিশেষকৈ চৰাঞ্চলসমূহৰ পৰা অসম মেঘালয় সীমান্তয়েদি প্ৰতিদিনেই পশুধন সৰবৰাহ হৈ আছে। সমান্তৰালভাৱে পশ্চিম গুৱাহাটীৰ অসম – মেঘালয় সীমান্তৰে বিভিন্ন ঠাইলৈ সৰবৰাহ কৰা অৱস্থাত বৃহস্পতিবাৰে পলাশবাৰী আৰক্ষীয়ে গোপন সূত্ৰৰ পম খেদি এ এছ ০১ ডি.ডি ৪৩৭৫ নম্বৰৰ এখন ডিআই বাহনত পশ্চিম গুৱাহাটীৰ উমশ্ৰুত সাতটা গৰু জব্দ কৰে। লগতে গাড়ী চালক বাগান নতুন চিমিনা গাৱঁৰ আচিত আলিকো কৰায়ত্ত কৰিবলৈ সক্ষম হয়।সম্প্ৰতি গৰুসহ বাহনখন পলাশবাৰী থানাত ৰখা হৈছে।ঘটনা সন্দৰ্ভত পলাশবাৰী আৰক্ষীয়ে ৪৮৪/২২ নম্বৰত গোচৰ ৰুজু কৰি চালকক সোধাপোচা অব্যাহত ৰাখিছে।
উল্লেখযোগ্য মহানগৰীৰ পৰা কিছু নিলগৰ পশ্চিম গুৱাহাটী সমষ্টিৰ অসম মেঘালয় সীমান্তৰ মাটাইখাৰ, উমশ্ৰু, জিমিৰগাঁও আদি অঞ্চলৰ বিভিন্ন পথৰে দিনৰ পোহৰতে চাৰিচকীয়া লঘু বাহন ঘাইকৈ ডি.আই বা পিক আপ ভানৰে প্ৰায় নিয়মীয়াকৈ চোৰাংকৈ মেঘালয় হৈ বাংলাদেশলৈ কেনেকৈ কি পথৰে গৰু সৰবৰাহ হয় সেই বিষয়ে সময়ে সময়ে সংবাদ মাধ্যমত বিতংকৈ প্ৰকাশ পাইছিল।