আদিল হুছেইনে আন্তঃৰাষ্ট্ৰীয় পৰ্যায়ত লাভ কৰিলে শ্ৰেষ্ঠ অভিনেতাৰ সন্মান

আকৌ এবাৰ আন্তঃৰাষ্ট্ৰীয় পৰ্যায়ত সুনাম কৰিবলৈ সক্ষম হ’ল অসমীয়াক গৌৰৱান্বিত কৰা অভিনেতা আদিল হুছেইন ৷ এইবাৰ লণ্ডনত অনুষ্ঠিত ‘ইউ কে ইণ্ডিয়ান ফিল্ম ফেষ্টিভেল’ত ‘ফুটপ্ৰিন্টছ্ অন ৱাটাৰ’ (Footprints on Water) নামৰ ছবিখনত কৰা অনবদ্য অভিনয়ৰ জৰিয়তে শ্ৰেষ্ঠ অভিনেতাৰ সন্মান লাভ কৰিবলৈ সক্ষম হ’ল অসম সন্তান তথা বলীউডৰ খ্যাতনামা অভিনেতাগৰাকীয়ে ৷

উল্লেখ্য, ১৩ মে’ত ‘ইউ কে ইণ্ডিয়ান ফিল্ম ফেষ্টিভেল’ত প্ৰিমিয়াৰ হৈছিল আদিল হুছেইন অভিনীত বলীউডৰ ছবিখনৰ ৷ উক্ত ছবিখনৰ পৰিচালনা নাটালিয়া শ্যামৰ। ব্ৰিটেইনলৈ হোৱা অনুপ্ৰৱেশ আৰু প্ৰৱজনকাৰীসকলে ব্ৰিটেইনত সন্মুখীন হোৱাৰ সমস্যাক বিষয়বস্তু হিচাবে লৈ ছবিখনৰ কাহিনীভাগ আগবঢ়াই নিয়া হৈছে ৷ ব্ৰিটেইনত অনুপ্ৰৱেশ কৰাৰ পাচত এগৰাকী পিতৃয়ে নিজ সন্তানক হেৰুৱাৰ কৰুণ কাহিনীৰ লগতে সন্তানৰ সন্ধান কৰাৰ বৰ্ণনা কৰা হৈছে ছবিখনত ৷

উক্ত ছবিখনৰ এক গুৰুত্বপূৰ্ণ চৰিত্ৰ ৰূপায়ণ কৰিছে অসম সন্তান আদিল হুছেইনে ৷ মন কৰিবলগীয়া যে, ‘ফুটপ্ৰিণ্টছ্ অন ৱাটাৰ’ ছবিখনে ইয়াৰ পূৰ্বে নিউয়ৰ্কত অনুষ্ঠিত ইণ্ডিয়ান ফিল্ম ফেষ্টিভেলত পৰিচালকৰ প্ৰথম ছবিৰ শিতানত শ্ৰেষ্ঠ ছবি হিচাবেও পুৰস্কৃত হৈছিল। উক্ত ছবি মহোৎসৱতো আদিল হুছেইনে শ্ৰেষ্ঠ অভিনেতাৰ বাবে মনোনয়ন লাভ কৰিছিল ।