বলীউডৰ বিগ-বিয়ে দক্ষিণৰ অভিনেতা মুখত প্ৰভাসক প্ৰসংশা কৰা দেখা গ’ল । দক্ষিণৰ ছুপাৰষ্টাৰ গৰাকীৰৰ সৈতে কাম কৰি প্ৰশংসাত পঞ্চমুখ বলীউড শ্বেহেনশ্বাহ। প্ৰথমবাৰৰ বাবে দুয়োজনে একেলগে একেখন ছবিতে অভিনয় কৰিছে। প্ৰবীণ অভিনেতা অমিতাভ বচ্চনৰ সৈতে অভিনয়ৰ সুযোগ লাভৰ পাছতে তাৰকা অভিনেতাগৰাকীৰ মুখত ফুটি উঠিছিল কৃতজ্ঞতাৰ শব্দ। অমিতাভৰ সৈতে অভিনয় কৰিবলৈ পাই নিজকে সৌভাগ্যৱান অনুভৱ কৰিছিল প্ৰভাসে।
প্ৰভাসেই নহয়,তৰুণ ছুপাৰষ্টাৰগৰাকীৰ সৈতে একেলগে অভিনয় কৰিবলৈ পাই মুগ্ধ হৈ পৰিছে অমিতাভ বচ্চন। এগৰাকী জ্যেষ্ঠ অভিনেতা হোৱা স্বত্বেও দক্ষিণৰ ছুপাৰষ্টাৰৰ প্ৰশংসা কৰা কথাটৱে বিগ-বি অমিতাভৰ সৰল ব্যক্তিত্বৰ প্ৰমাণ দিছে। তেওঁ কয়, ‘প্ৰথম দিন, প্ৰথম দৃশ্যগ্ৰহণ আৰু প্ৰভাসৰ সৈতে প্ৰথম চলচ্চিত্ৰ। তেওঁৰ প্ৰতিভা আৰু অত্যন্ত নম্ৰ স্বভাৱৰ বাবে অশেষ ধন্যবাদ। তেওঁৰ সৈতে থকাৰ অৰ্থ হৈছে এক অনন্য সন্মান লাভ আৰু নতুন কিবা শিকাৰ সুযোগ।’
চলচ্চিত্ৰখনৰ প্ৰথম দিনটোৰ পৰাই দুয়োজনৰ পৰস্পৰৰ প্ৰতি থকা সন্মানে দৰ্শকৰ অন্তৰ জয় কৰিছে। প্ৰভাসে আগতে কৈছিল যে তেওঁ অমিতাভ অনুৰাগী আৰু গোটেই জীৱন তেওঁৰ চলচ্চিত্ৰৰ দ্বাৰা অনুপ্ৰাণিত হৈ আহিছে। আনহাতে, দীপিকা পাডুকনকো ছবিখনত দুয়োগৰাকী ছুপাৰষ্টাৰৰ সৈতে অভিনয় কৰা দেখিবলৈ পাব অনুৰাগীয়ে।
