গুৱাহাটীৰ দক্ষিণ প্ৰান্তৰ গড়চুকৰ কাষৰীয়া পামহীৰ পদ্মৰাম ভৰালী খেলপথাৰত থকা শ্ৰীশ্ৰীকৃষ্ণ গীতা মন্দিৰ প্ৰাংগনত ৭ নৱেম্বৰৰ পৰা সাতদিনীয়া কাৰ্যসূচীৰে আৰম্ভ হৈছে ২৩ সংখ্যক পামহী আঞ্চলিক ৰাস উৎসৱ। সাদিনীয়া কাৰ্যসূচীৰে আয়োজন কৰা ৰাস উৎসৱত স্থাপন কৰা মৃণ্ময় মূৰ্তিসমূহ বিজুলীৰ আলোকেৰে সজাই পৰাই তোলা হৈছে। ৰাস উৎসৱত জনজাতীয় সমাজত দৈনন্দিন ব্যৱহাৰ হৈ অহা পৰম্পৰাগত সা-সামগ্ৰীসমূহ প্ৰদৰ্শনৰো ব্যৱস্থা কৰা হৈছে। উৎসৱৰ ৭ নৱেম্বৰৰ প্ৰথম দিনটোত পুৱা শ্ৰীশ্ৰীবংশী গোপাল মন্দিৰৰপৰা ৰাসস্থলীলৈ আয়োজন কৰা শোভাযাত্ৰাত বৃহত্তৰ অঞ্চলটোৰ বহুসংখ্যক লোকে অংশগ্ৰহণ কৰে । ৰাস উৎসৱৰ দ্বাৰ মুকলি কৰে সমাজসেৱক উৎপল কুমাৰ দাসে। স্মৃতি তৰ্পণ কৰে দয়াৰাম কাথাৰ আৰু গোৱিন্দ বড়োৱে। বিয়লি ৰাস মণ্ডপ উদ্বোধন কৰে সমাজসেৱক বলেশ্বৰ ৰংপিয়ে। ৰাস মণ্ডপ উদ্বোধনৰ পাছতে গীতা পাঠ আৰু আয়তীসকলৰ নাম-প্ৰসংগ আৰম্ভ হয়।
আনহাতে ৮ নৱেম্বৰৰ সন্ধিয়া ৰাস মহোৎসৱস্থলীত দয়াৰাম কাথাৰৰ প্ৰণীত দুখন গ্ৰন্থ ক্ৰমে শ্ৰী মদ্ভাগবতৰ নিৰ্বাচিত উপাখ্যান আৰু কাৰ্বি লামথে আজিব আক্ষন্দা ( কাৰ্বি শব্দৰ অৰ্থৰ ভঁৰাল ) উন্মোচন কৰা হয়। গ্ৰন্থ দুখন উন্মোচন কৰে চকৰদৌ প্ৰাথমিক বিদ্যালয়ৰ অৱসৰপ্ৰাপ্ত প্ৰধান শিক্ষক সুগ্ৰীৱ ৱে আৰু বৃহত্তৰ গুৱাহাটী কাৰ্বি মহিলা সমাজৰ কাৰ্যকৰী সভানেত্ৰী ববিতা ৰাণী টেৰনপীয়ে। এই উপলক্ষে সমাজকর্মী গোবিন্দ চন্দ্ৰ বড়োৰ সভাপতিত্বত অনুষ্ঠিত সভাত বৃহত্তৰ গুৱাহাটী কাৰ্বি মহিলা সমাজৰ সভানেত্ৰী সৰলা কাথাৰ বৰদলৈ, পামহী ৰাস মহোৎসৱ উদযাপন সমিতিৰ উপ সভাপতি বলেশ্বৰ ৰংপী, পাৰবিন বড়ো , ইৰাণী চিৰিং কাথাৰ, চুইতি বড়োকে ধৰি কেবাজনো বিশিষ্ট লোক, ৰাস মহোৎসৱ উদযাপন সমিতিৰ কেবাগৰাকী কৰ্মকর্তা উপস্থিত থাকে।
আনহাতে উদযাপন সমিতিৰ সভাপতি দীপক বড়ো ( কুলি ) সম্পাদকদ্বয় জয়ন্ত টুমুং আৰু পুনাল বড়োৱে জনোৱা মতে, অহা ১৩ নৱেম্বৰলৈকে চলিবলগীয়া ৰাস উৎসৱৰ মহোৎসৱৰ আটাইকেইদিনতে নিতৌ পুৱা পূজা পাঠৰ পাছত গীতা পাঠ আৰু নামতীৰ নাম-প্ৰসংগৰ দিহা কৰা হৈছে। উৎসৱৰ বিভিন্ন কাৰ্যসূচীত সন্মানীয় অতিথি হিচাপে গুৱাহাটীৰ সাংসদ কুইন ওজা, পশ্চিম গুৱাহাটীৰ বিধায়ক ৰমেন্দ্ৰ নাৰায়ণ কলিতা , গড়চুক আৰক্ষী থানাৰ ভাৰপ্ৰাপ্ত বিষয়া সত্যেন্দ্ৰ সিং হাজাৰী, যান-বাহন শাখাৰ দায়িত্বপ্রাপ্ত বিষয়া মুকুট বৈশ্য, আজাৰা গাঁও পঞ্চায়তৰ সভানেত্রী কবিতা বড়ো ৰংপীকে ধৰি কেবাজনো বিশিষ্ট লোক উপস্থিত থাকিব।
