জনসাধাৰণৰ নিৰন্তৰ দাবীৰ প্ৰতি সঁহাৰি জনাই দূৰদৰ্শন, অসমে বৰ্তমানৰ ১৫ মিনিটৰ সন্ধিয়াৰ বুলেটিনৰ পৰিৱৰ্তে ৩০ মিনিটৰ বুলেটিন সম্প্ৰচাৰ কৰিব। দূৰদৰ্শন, অসমে ১৯৮৫ চনৰ ২৪ মাৰ্চত অসমীয়া ভাষাত আঞ্চলিক বাতৰি বুলেটিন সন্ধিয়াৰ বাতৰি মুকলি কৰি যাত্ৰা আৰম্ভ কৰিছিল।দৈনিক সন্ধিয়া ৬.৩০ বজাত প্ৰচাৰিত হোৱা এই ১৫ মিনিটৰ সন্ধিয়াৰ বাতৰি বুলেটিন এক বহুল প্ৰচাৰিত অনুষ্ঠান হিচাপে বিবেচিত হৈছে।বিগত বছৰ বোৰত দৰ্শকৰ মাজত এই জনপ্ৰিয়তাৰ বাবে, বুলেটিনখন এতিয়া ১ ডিচেম্বৰ, ২০২২-ৰ পৰা ৩০ মিনিটৰ বাবে সম্প্ৰচাৰ কৰা হ’ব। সোমবাৰৰ পৰা শুকুৰবাৰে, বুলেটিনখন সন্ধিয়া ৬.১৫ বজাৰ পৰা সন্ধিয়া ৬.৪৫ বজালৈ সম্প্ৰচাৰিত হ’ব, আনহাতে সপ্তাহান্তত, সন্ধিয়া ৬.৩০ বজাৰ পৰা ১৫ মিনিটৰ বাবে সম্প্ৰচাৰিত হৈ থাকিব।
এই সন্দৰ্ভত তথ্য প্ৰকাশ কৰি কৰি দূৰদৰ্শন, অসমৰ আৰ এনইউৰ মুৰব্বী অংকুৰ লাহটিয়ে কয় যে “ডিডি অসমৰ সন্ধিয়া ৬:৩০ বজাৰ বুলেটিন হৈছে সকলো বাতৰি চেনেল সমূহৰ ভিতৰত সৰ্বাধিক সম্প্ৰচাৰিত বুলেটিন সমূহৰ ভিতৰত এখন। দৰ্শকৰ চাহিদা বিশ্লেষণ কৰি এতিয়া সোমবাৰৰ পৰা শুকুৰবাৰৰ ভিতৰত সন্ধিয়া ৬:১৫ বজাৰ পৰা আৰম্ভ কৰি আধা ঘণ্টাৰ বুলেটিন প্ৰস্তুত কৰাৰ সিদ্ধান্ত লোৱা হৈছে।”
তেওঁ লগতে জনায় যে ডিডি নিউজ অসমে ডিচেম্বৰৰ মাজভাগৰ পৰা দৃষ্টি আৰু যুক্তি-টু-দ্য-পইণ্ট শীৰ্ষক এক ৩০ মিনিটৰ আলোচনা কাৰ্যসূচী আৰম্ভ কৰিব।তেওঁ কয়, “ডিডি অসম ৰাজহুৱা সম্প্ৰচাৰক হোৱাৰ বাবে সম্প্ৰচাৰ আৰু বাতৰি প্ৰচাৰৰ সৰ্বোচ্চ মানদণ্ডৰ প্ৰতি প্ৰতিশ্ৰুতিবদ্ধ। বিভিন্ন নীতি আৰু সামাজিক-সাংস্কৃতিক বিষয়ত শেহতীয়া উন্নয়ন আৰু অগ্ৰগতিৰ সৈতে অসমৰ জনসাধাৰণক তথ্যৰে অৱগত কৰি ৰখাৰ প্ৰচেষ্টাত এই ধৰণৰ আলোচনা কাৰ্যসূচীয়ে এনে এক স্থান দখল কৰিব য’ত নীতি নিৰ্ধাৰণ কৰোঁতা, মুখ্য বিশেষজ্ঞ, ৰাজনৈতিক নেতাসকলক জনসাধাৰণৰ গুৰুত্বপূৰ্ণ বিভিন্ন বিষয়ৰ সৈতে সম্পৰ্কিত আলোচনাৰ বাবে আমন্ত্ৰণ জনোৱা হ’ব।” এই অনুষ্ঠানটো মঙলবাৰে আৰু শুকুবাৰে নিশা ৮ বজাত ডিডি অসমত সম্প্ৰচাৰিত হোৱাৰ লগতে শনিবাৰে আৰু দেওবাৰে ইয়াৰ পুনৰাবৃত্তি হ’ব।
