ক’ৰোনাৰ ভয়ংকৰ সংক্ৰমণ দেশত। বৰ্তমানলৈকে লকডাউন ঘোষণা কৰা হোৱা নাই যদিও বিভিন্ন ৰাজ্যত বহু ক্ষেত্ৰত নিষেধাজ্ঞা আৰোপ কৰা হৈছে। জাৰি কৰা হৈছে নৈশ কাৰ্ফিউ। এনে এক সময়ত পুনৰ দেশৰ প্ৰবজিত শ্ৰমিক সকলৰ মাজত সৃষ্টি হৈছে আতংকৰ।
কোভিডৰ প্ৰথম লহৰৰ সময়ছোৱাত সৃ্ষ্টি হোৱা হাহাকাৰ পৰিবেশ-পৰিস্থিতিৰ কথা নিশ্চয় সকলোৰে মনত আছে। শেহতীয়াকৈ দেশৰ বিভিন্ন ৰাজ্যত ক’ৰোনাৰ সংক্ৰমণ বৃদ্ধি পোৱাৰ বাবে পুনৰ শ্ৰমিকৰ মাজত সৃষ্টি হৈছে আতংকৰ। বিশেষকৈ মহাৰাষ্ট্ৰত ক’ভিড সংক্ৰমণে ভয়ংকৰ ৰূপ ধাৰণ কৰাৰ বাবে শ্ৰমিকসকলে মহাৰাষ্ট্ৰ এৰি স্বগৃহলৈ ঘূৰি আহিবলৈ ইচ্ছা কৰিছে। মুম্বাইত প্ৰবজনকাৰী হাজাৰ হাজাৰ শ্ৰমিকে ৰে’ল ষ্টেচনত পুনৰ শিবিৰ পাতিছে। সকলোৱে মু্ম্বাইত লকডাউন হোৱাৰ আশংকাক নিজ ঘৰলৈ যাবলৈ চেষ্টা কৰিছে। ৰে’লৱে ষ্টেচনত ভিৰ কৰা হাজাৰ হাজাৰ শ্ৰমিকৰ ওপৰত আৰক্ষীয়ে লাঠি চালনাও কৰিবলগীয়া হৈছে।
ৰে’লৱে ষ্টেচনত ভিৰ কৰা হাজাৰ হাজাৰ শ্ৰমিকক আৰক্ষীয়ে তাৰ পৰা স্থানান্তৰ কৰিবলৈ গৈও বিপদত পৰিছে। শ্ৰমিকৰ এটাই কথা, যদি লকডাউন হয় তেনেহ’লে তেওঁলোক ভোকত মৃত্যুমুখত পৰিব। দৰাচলতে মুম্বাইত যোৱা ২৪ ঘণ্টাত ২০ হাজাৰৰো অধিক লোক কোৰোনাত আক্ৰান্ত হৈছে। মুম্বাইৰ লগতে মহাৰাষ্ট্ৰত কোভিড প্ৰ’টকল অধিক কঠোৰ কৰা হৈছে। জাৰি কৰা হৈছে এছ অ’ পি। নিশাৰ কাৰ্ফিউৰ উপৰিও বহু ক্ষেত্ৰত বাধা আৰোপ কৰা হৈছে। এনে পৰিস্থিতিত শ্ৰমিকসকলে লকডাউনৰ আশংকাত মুম্বাই এৰিবলৈ বিচাৰিছে।
