মহানগৰ গুৱাহাটীত যান-বাহনৰ চূড়ান্ত কৰফাঁকি আৰু নথিপত্ৰৰ নানানটা বিসঙ্গতিৰে চলা বাহনৰ গৰাকীলৈ পৰিবহন বিভাগৰ তৰফৰ পৰা চূড়ান্ত সকীয়নি। নথিপত্ৰ নৱীকৰণ আৰু কৰ পৰিশোধ নকৰা যান-বাহনৰ গৰাকীসকল নিতৌ ধৰা পৰিছেহি পৰিবহণ বিভাগৰ অতৰ্কিত তালাচীত। এনেবোৰ বাহনৰ চতুৰালিৰ বিৰুদ্ধে সোমবাৰেও মহানগৰীৰ কেইবাটাও গুৰুত্বপূৰ্ণ স্থানত অভিযানত নামে কামৰূপ মহানগৰ জিলা পৰিবহণ বিভাগৰ অভিযানকাৰী দল।
সহকাৰী পৰিবহণ আয়ুক্ত তথা অতিৰিক্ত দায়িত্ববাহী কামৰূপ মহানগৰ জিলা পৰিবহণ বিষয়া গৌতম দাসৰ তত্বাৱধানত, জিলা পৰিবহণ বিষয়া (প্ৰৱৰ্তক শাখা) হিমাংশু কুমাৰ দাসৰ নেতৃত্বত, পৰিবহণ প্ৰাধিকাৰী ৰফিকুল ইছলাম, যানবাহন পৰিদৰ্শক বলেন পাঠক, দুৰ্গা গগৈৰ লগতে প্ৰৱৰ্তক পৰিদৰ্শক আৰু সহকাৰী প্ৰৱৰ্তক পৰিদৰ্শককে ধৰি বিভাগৰ অন্যান্য বিষয়া-কৰ্মীৰ দল কেইবাটাও ভাগত বিভক্ত হৈ মহানগৰীৰ বেতকুছি, তেতেলীয়া, ভূটনাথ, সৰুসজাই, খানাপাৰা, সোনাপুৰ আদি বিভিন্ন অঞ্চলৰ ৰাজপথত ১০০০ৰো অধিক বাহনত তন্নতন্নকৈ তালাচী চলায়।
তালাচীৰ সময়ত বাহনৰ কৰ অনাদায়ৰ লগতে নথিপত্ৰ নৱীকৰণৰ ক্ষেত্ৰত ধৰা পৰা বিভিন্ন বিসঙ্গতিত ২৫০ৰো অধিক বাহনৰ বিৰুদ্ধে যান-বাহন আইনৰ অধীনত ঠিতাতে গোচৰ ৰুজু কৰাৰ লগতে দীৰ্ঘদিন ধৰি কৰ আদায় নিদিয়াৰ গুৰুতৰ অভিযোগত ৯০খন বাহন জব্দও কৰে। দিনকদিনে তীব্ৰতৰ হৈ উঠা বিভাগৰ অভিযান সন্দৰ্ভত মন্তব্য কৰাৰ উপৰি সহকাৰী পৰিবহণ আয়ুক্ত গৌতম দাসে কয় যে সকলো যানবাহনৰ গৰাকীৰে সুবিধাৰ প্ৰতি লক্ষ্য ৰাখি অহা ৩১মাৰ্চলৈকে কামৰূপ মহানগৰ জিলা পৰিবহণ বিভাগৰ কাৰ্যালয় শনিবাৰ-দেওবাৰকে ধৰি সকলো দিনতে ৰাতিপুৱা ৯ বজাৰ পৰা নিশা ৯ বজালৈকে খোলা থাকিব৷ তেওঁৰ মতে এইখিনি সময়ত যান-বাহনৰগৰাকী পৰিবহণ বিষয়াৰ কাৰ্যালয়লৈ আহি কৰ আদায় দিয়াৰ উপৰি নথিপত্ৰ নৱীকৰণকে ধৰি সকলো কাম সমাধা কৰিব পাৰিব।
উল্লেখ্য যে, যানবাহনৰ তালাচীৰ সমান্তৰালভাৱে সোমবাৰে বিভাগৰ বিভিন্ন বিষয়া-কৰ্মীৰ দলে ভাগে ভাগে মহানগৰীৰ বিভিন্ন ঠাইত ব্যক্তিগত আৰু ব্যৱসায়িক বাহনৰ গৰাকী, উদ্যোগ-প্ৰতিষ্ঠান, নিৰ্মানকাৰী সংস্থাৰ কাৰ্যালয় আদিত উপস্থিত হৈ শীঘ্ৰে বকেয়াসহ যাৱতীয় সকলো কৰ আদায় দিয়াৰ লগতে বাহনৰ নথিপত্ৰসমূহ নৱীকৰণ কৰিবলৈ চূড়ান্ত সকীয়নি দিয়ে।
