ৰাজ্যত কভিড পৰিস্থিতি ক্রমাৎ সুস্থিৰ হৈ আহিছে৷ কভিড পৰিস্থিতি উন্নত হোৱাৰ পৰিপ্রেক্ষিতত চৰকাৰে আগন্তুক ১ অক্টোবৰৰ পৰা কভিড বিধি অধিক শিথিল কৰাৰ সম্ভাৱনা প্রকট হৈছে৷ লক্ষণীয়ভাৱে কভিড বিধি শিথিল কৰাৰ সমান্তৰালভাৱে চৰকাৰে সম্প্রতি অতি সীমিত কৰি ৰখা পর্যটন ক্ষেত্রও মুকলি কৰি দিয়াৰ লগতে শিক্ষানুষ্ঠানৰ অন্য কেইবাটাও শ্রেণীৰ পাঠদান পুনৰ আৰম্ভ কৰাৰ পৰিকল্পনা কৰিছে৷
আজি মুখ্যমন্ত্রী ড০ হিমন্ত বিশ্ব শর্মাই এই কথা ঘোষণা কৰিছে৷ তেওঁ আজি প্রকাশ কৰে যে ৰাজ্যত কভিড পৰিস্থিতি পূর্বতকৈ বহু উন্নত হৈছে৷ সেয়ে যি স্থানত কভিডৰ সংক্রমণ প্রায় নির্মূল হৈছে, তাত বাধ্যবাধকতা অধিক শিথিল কৰা হ’ব৷ অৱশ্যে কিছুসংখ্যক জিলা পর্যবেক্ষণত ৰখা হ’ব বুলিও তেওঁ প্রকাশ কৰে৷ আনহাতে ৰাজ্যত এতিয়াও সম্পূর্ণ মুকলি কৰি দিব পৰা অৱস্থালৈ অহা নাই বুলি সদৰী কৰি মুখ্যমন্ত্রীজনে বিভিন্ন ক্ষেত্রত প্রয়োজনীয় কিছু বাধা থাকিবই বুলি কয়৷
আনহাতে পর্যটন ক্ষেত্রসমূহো পর্যায়ক্রমে খুলি দিয়াৰ কথা চৰকাৰে পৰিকল্পনা কৰাৰ কথা ব্যক্ত কৰি তেওঁ অহা ১ অক্টোবৰৰ পৰা বিশ্ববিখ্যাত কাজিৰঙা ৰাষ্ট্রীয় উদ্যানকে ধৰি মানাহ, ওৰাং, পবিতৰা আদি পর্যটকৰ বাবে সম্পূর্ণ খুলি দিয়া হ’ব বুলি ঘোষণা কৰে৷ এই ঠাইত কভিডৰ কোনো বাধা নাথাকিব বুলিও তেওঁ ঘোষণা কৰে৷
অৱশ্যে কভিড প্রট’কলৰ ভিতৰত কেৱল এটাই থাকিব, সেয়া হ’ল সকলোৱে ভেকচিন ল’ব লাগিব৷ পর্যটন ক্ষেত্রসমূহ যিমান পাৰি পুনৰ খুলি দিয়াৰ কথা চৰকাৰে চিন্তা কৰাৰ কথা সদৰী কৰি তেওঁ কয় যে যোৱা কভিড পৰিস্থিতিত ৰাজ্যৰ পর্যটন ক্ষেত্রৰ সৈতে জড়িত ব্যক্তিসকল যথেষ্ট ক্ষতিগ্রস্ত হয় বুলি তেওঁ কয়৷ হোটেলত থকাৰ ক্ষেত্রত পর্যটকসকলে ভেকচিন লোৱাটো বাধ্যতামূলক কৰাৰ কথা তেওঁ কয়৷ প্রয়োজনত পর্যটকক ওচৰৰ স্বাস্থ্যকেন্দ্রলৈ নি ভেকচিন দিয়াই লোৱাৰ পদক্ষেপ ল’বলৈয়ো তেওঁ এই ক্ষেত্রৰ সৈতে জড়িত লোকসকলক আহবান জনায়৷
