অমিক্ৰনৰ লগতে ডেল্টা ভেৰিয়েণ্টেও বঢ়াইছে আতংক

বিশ্বৰ বিভিন্ন দেশৰ লগতে ভাৰততো বাঢ়িছে ক’ৰোনাৰ অমিক্ৰন ভেৰিয়েণ্টৰ সংক্ৰমণ। যি সময়ত অমিক্ৰনৰ সংক্ৰমণে সকলোৰে টোপনি হৰিছে সেই সময়তে বিশ্ব স্বাস্থ্য সংস্থাই দিছে আন এক বিশেষ সকীয়নি। অমিক্ৰনৰ সংক্ৰমণৰ সমান্তৰালকৈ ডেল্টা ভেৰিয়েণ্টৰ প্ৰকোপো বাঢ়িছে বুলি সতৰ্ক কৰি দিছে বিশ্ব স্বাস্থ্য সংস্থাই। WHOৰ মতে এইবাৰ অমিক্ৰন আৰু ডেল্টা ভেৰিয়েণ্টে একেলগে ভয়াৱহ পৰিস্থিতিৰ সৃষ্টি কৰিব পাৰে।
WHOৱে ডেল্টা আৰু অমিক্ৰনক টুইন থ্ৰেট আখ্যা দিছে আৰু কৈছে যে এই দুয়োটাই অধিক সংক্ৰমণ, হস্পিটেলাইজেচন আৰু মৃত্যুৰ কাৰণ হ’ব পাৰে। WHOৰ তথ্য মতে বিগত এক সপ্তাহত সমগ্ৰ বিশ্বত কোৰোণাৰ সংক্ৰমণ ১১ শতাংশ বৃদ্ধি পাইছে। WHOৰ মুৰব্বী টেড্ৰোছে কয় যে ডেল্টা আৰু অমিক্ৰনে এইবাৰ সংক্ৰমণৰ ছুনামী নমাই আনিব পাৰে।
ভাৰতত অমিক্ৰনত আক্ৰান্তৰ সংখ্যা ৯৬১ জনলৈ বৃদ্ধি পাইছে। দিল্লী, মহাৰাষ্ট্ৰ আৰু গুজৰাটত অধিক সংক্ৰমণ হৈছে অমিক্ৰনৰ।