২০২১ বৰ্ষৰ অসম প্ৰকাশন পৰিষদৰ সাহিত্য বঁটা প্ৰদান কৰা হ’ব লেখিকা নন্দিতা দেৱীক। ডাঃ নন্দিতা দেৱীৰ ‘বঙল বহু দূৰ’ নামৰ গ্ৰন্থৰ বাবে এইবৰ্ষৰ সন্মানীয় সাহিত্য বঁটা প্ৰদান কৰা হ’ব। এই কথা সদৰী কৰিছে অসম প্ৰকাশন পৰিষদৰ সচিব প্ৰমোদ কলিতাই।
উল্লেখ্য যে ২৯ ডিচেম্বৰৰ পৰা আৰম্ভ হ’বলগীয়া এই সাহিত্য উৎসৱৰ উদ্বোধনী অনুষ্ঠানতে প্ৰদান কৰা হ’ব এই বঁটা। এই বঁটাৰ সৈতে ২ লাখ টকাকৈ প্ৰদান কৰা হ’ব লেখক আৰু প্ৰকাশক উভয়কে। গ্ৰন্থখন ‘জ্যোতি প্ৰকাশন’ৰ হৈ প্ৰকাশক নগেন শৰ্মাই প্ৰকাশ কৰিছে।
এই বঁটাৰ বাবে গ্ৰন্থ নিৰ্বাচনৰ বাবে দুতৰপীয়া সমিতি গঠন কৰা হৈছিল। বিশিষ্ট লেখক সুমন্ত চলিহাক অধ্যক্ষ হিচাপে লৈ গঠন কৰা পাচজনীয়া বিচাৰকৰ দলত আছিল কৰবী ডেকা হাজৰিকা, দীপ্তি ফুকন পাটগিৰি, লীনা শৰ্মা আৰু উৎপল দত্ত।২৯ ডিচেম্বৰৰ পৰা ৯ জানুৱাৰীলৈ অসম অভিযান্ত্ৰিক মহাবিদ্যালয়ৰ খেলপথাৰত অনুষ্ঠিত হ’ব লগা গ্ৰন্থমেলাই পাঠকৰ বিপুল সঁহাৰি লাভ কৰিব বুলি আশা কৰিছে প্ৰকাশন পৰিষদৰ সচিব প্ৰমোদ কলিতাই। বিগত বছৰত ক’ভিড পৰিস্থিতিৰ মাজতো গ্রন্থমেলাই পূৰ্বৰ সকলো ৰেকৰ্ড ভংগ কৰি গ্ৰন্থ বিক্ৰীৰ অভিলেখ সৃষ্টি কৰিছিল। ১ কোটি ৯২ লাখ গ্ৰন্থ বিক্ৰী হৈছিল ২০২০-২১ বৰ্ষত। এইবাৰৰ গ্ৰন্থমেলাত মুঠ ১১৫ খন বিপণী থাকিব। ইয়াৰে দিল্লীৰ ১০খন, কলিকতাৰ ৫খন আৰু ঢাকাৰ ৫খন বিপণী থাকিব। সম্পূৰ্ণ ক’ভিড বিধি অনুসৰি অনুষ্ঠিত কৰা হ’ব গ্রন্থমেলা। ১৬খন গ্ৰন্থ সংকলন পোৱা যাব প্ৰকাশন পৰিষদৰ এই গ্ৰন্থমেলাত।
