বলিষ্ঠ অভিনেতা অসম সন্তান আদিল হুছেইনে পুনৰ কঢ়িয়াবলৈ সক্ষম হৈছে এক সুনাম৷ ৱাশ্বিংটন ডিচি ছাউথ এছিয়ান ফিল্ম ফেষ্টিভেলত সর্বশ্রেষ্ঠ অভিনেতাৰ সন্মানেৰে সন্মানিত কৰা হৈছে অভিনেতাগৰাকীক৷ “ৰাহগিৰ” নামৰ ছবিখনত কৰা অভিনয়ৰ বাবে অসম সন্তান গৰাকীলৈ এই সন্মান আগবঢ়োৱা হৈছে৷ এই কথা অভিনেতা গৰাকীয়ে নিজৰ টুইটাৰ যোগে প্রকাশ কৰে। লগতে তেওঁ এই সন্মান লাভ কৰি আনন্দিত বুলিও আত্মপ্রকাশ কৰে৷
উল্লেখ্য যে, ২০১৯ চনত নির্মাণ কৰা এই ছবিখনৰ ঝাৰখণ্ডত দৃশ্যগ্রহণ কৰা হৈছিল৷ ছবিখনত মূলত: গ্রাম্য ভাৰত, জনজাতীয় লোকসকলৰ জীৱনশৈলী তথা বিশেষকৈ গ্রামাঞ্চল আৰু চহৰ অঞ্চলৰ মাজত থকা পার্থক্যসমূহ দাঙি ধৰা হৈছিল৷ ৱাশ্বিংটন ডি চি ছাউথ এছিয়ান ফিল্ম ফেষ্টিভেলত দক্ষিণ এছিয়াৰ বিভিন্ন বিষয়ত নির্মিত ছবিসমূহ প্রদর্শন কৰা হৈছিল৷ এই ছবি মহোৎসৱ যোৱা ২৮ আগষ্টৰ পৰা দুদিনীয়াকৈ অনুষ্ঠিত হৈছিল৷ উল্লেখ্য যে, ইয়াৰ পূর্বেও আদিল হুছেইন কেইবাখনো ছবিত কৰা উল্লেখযোগ্য অভিনয়ৰ বাবে বিভিন্ন সন্মানেৰে সন্মানিত হৈছিল৷