বহু ঘাত-প্ৰতিঘাতেৰে মাজেৰে পাৰ হৈ যোৱা অসমৰ এটা জনজাতি ৷ নিজৰ অস্তিত্ব জাহিৰ কৰিবলৈ বহু আন্দোলন, উগ্ৰপন্থাৰ আশ্ৰয় ল’বলগীয়া হৈছিল এই জনজাতিটো ৷ অসমলৈ চৰকাৰ আহিছে গৈছে, কেন্দ্ৰত চৰকাৰ আহিছে গৈছে, তথাপিও যেন ৰাজনীতিৰ মেৰ-পেচত সমাধান নোহোৱাকৈ ৰৈ গৈছিল এই জনজাতিটোৰ সমস্যা ৷ হয়, আপুনি ঠিকেই ধৰিব পাৰিছে ৷ আমি কৈ আছো অসমৰ ইতিহাসৰ বহু ঘাত-প্ৰতিঘাতৰ সাক্ষী এটা অন্যতম জনজাতি বড়ো জনজাতিৰ কথা ৷
বড়োলোকসকল স্বাভাৱিকতেই স্বাধীনতাপ্ৰিয় জাতি ৷ নামনি অসমত ঘাইকৈ এওঁলোকৰ মূল বসতি ৷ দেশৰ স্বাধীনতাৰ দিনৰে পৰা অসমীয়াভাষী লোকসকলৰ সৈতে বড়োভাষী লোকসকলেও অসমৰ উন্নতিত অৱদান আগবঢ়াই আহিছে ৷ তথাপিও যেন ক’ৰবাত কিবা এটা নাই ৷ অসমৰ এক অন্যতম জনগোষ্ঠী হিচাপে যেনে মৰ্যাদা পাব লাগিছিল তেনে মৰ্যাদাৰ পৰা বঞ্চিত হৈ আছিল বড়ো লোকসকল ৷ ফলত বহু বড়ো যুৱকে হাতত তুলি লৈছিল অস্ত্ৰ ৷ কিন্তু অস্ত্ৰৰে জানো সমস্যাৰ সমাধান সম্ভৱ ৷ অৱশেষত ভাৰতীয় সংবিধানৰ ষষ্ঠ অনুসূচীৰ অধীনত ২০০৩ চনত গঠিত হৈছিল বড়োলেণ্ড টেৰিটৰিয়েল কাউন্সিল চমুকৈ বিটিচি ৷ বিটিচি গঠন হোৱাৰ পিছত স্বায়ত্ব শাসনৰ সুবিধা লাভ কৰিলে জনজাতিটোৱে ৷
নামনি অসমৰ এক বিশাল এলেকা বিটিচিৰ অধীনলৈ আহিল ৷ কেৱল বড়োসকলেই নহয়, অসমীয়া, ৰাভা, বঙালী, কোঁচ-ৰাজবংশী, গাড়ো, মুছলমান, নেপালী জনগোষ্ঠীৰ লোকসকলেও সমিল মিলেৰে বাস কৰিবলৈ ধৰিলে ৷
নৱগঠিত বিটিচিৰ গুৰি বঠা তুলি ধৰিলে হাগ্ৰামা মহিলাৰী নেতৃত্বাধীন বড়োলেণ্ড পিপলছ ফ্ৰণ্ট চমুকৈ বিপিএফ নামৰ ৰাজনৈতিক দলটোৱে ৷ ২০০৫ চনত গঠন হোৱা সেই বিপিএফৰ অন্যতম প্ৰতিষ্ঠাতা সদস্য আছিল ইমানুৱেল মুছাহাৰী ৷ সেই ইমানুৱেল মুছাহাৰী যিয়ে পিছলৈ বড়ো ভূমিক ৰাষ্ট্ৰীয় পৰ্যায়ত প্ৰতিষ্ঠা কৰাৰ বাবে লৈছিল এটা কঠিন সিদ্ধান্ত ৷ কি আছিল সেই কঠিন সিদ্ধান্ত ?
১৯৬৩ চনৰ চনৰ ১১ নৱেম্বৰৰ বাক্সা জিলাৰ পাটকিজুলিত জন্ম হৈছিল ইমানুৱেল মুছাহাৰীৰ ৷ চাৰিগৰাকী ভাতৃ-ভগ্নীৰ মাজত কনিষ্ঠ মুছাহাৰীয়ে শ্বিলঙৰ ইউ চি চিৰ পৰা স্নাতক আৰু স্নাতকোত্তৰ ডিগ্ৰী লাভ কৰিছিল আৰু ছাত্ৰ জীৱনৰ পৰাই নামি পৰিছিল সক্ৰিয় ৰাজনীতিত ৷ কলেজৰ অধ্যাপনাৰ দৰে চাকৰি বাদ দি নামি পৰিছিল তেওঁ ৰাইজৰ সেৱাত ৷ ১৯৮৭ চনত দুবাৰকৈ এবছুৰ সম্পাদক হিচাপে কাৰ্যনিৰ্বাহ কৰি এবছুৰ কেন্দ্ৰীয় সমিতিৰ মহাসচিব হিচাপে কাৰ্যনিৰ্বাহ কৰিছিল নেতাগৰাকীয়ে ৷ বিটিচি এলেকাত বিপিএফৰ প্ৰথমজন এম চি এল হিচাপে জয়লাভ কৰাৰ পিছতে তেওঁক শিক্ষা, স্বাস্থ্য আৰু পৰিয়াল কল্যাণ বিভাগ চোৱা চিতাৰ দায়িত্ব প্ৰদান কৰা হৈছিল ৷ কেৱল ৰাজনীতিয়েই নহয়, এজন দায়িত্বশীল সমাজ সেৱক হিচাপে মুছাহাৰীয়ে কোকৰাঝাৰত চি আই টি আৰু বড়োলেণ্ড বিশ্ববিদ্যালয় স্থাপনতো গুৰুত্বপূৰ্ণ ভূমিকা পালন কৰিছিল ৷ তাৰোপৰি ভাৰত-ভূটান নাগৰিক মঞ্চৰ অধ্যক্ষ হিচাপে ভাৰতীয়সকলে ভূটানৰ পানীৰ ওপৰত কৰ পৰিশোধ নকৰাকৈয়ে পানী ব্যৱহাৰ কৰিব পৰাকৈ ব্যৱস্থা কৰি দিছিল তেওঁ ৷ ২০১০ আৰু ২০১৬ চনত ইমানুৱেল মুছাহাৰীয়ে তামোলপুৰ সমষ্টিক প্ৰতিনিধিত্ব কৰি বিপুল ভোটত জয় লাভ কৰে আৰু সমষ্টিবাসীৰ প্ৰতি সেৱা আগবঢ়ায় যায় ৷
ইতিমধ্যে বহু ধুমুহা পাৰ হৈ গ’ল বিটিচিত ৷ ২০২০ চনৰ ২৭ জানুৱাৰীত বড়ো চুক্তি অনুসৰি বিটিএডি পৰিৱৰ্তিত হ’ল বিটিআৰলৈ ৷ অসমত ২০২১ চনৰ বিধানসভাৰ নিৰ্বাচনৰ পৰিপ্ৰেক্ষিতত মিত্ৰতাকেন্দ্ৰিক বহু নাটৰ অন্তত একাষৰীয়া হ’ল বিপিএফ চীফ হাগ্ৰামা মহিলাৰী ৷ সেই বৰ্ষতে অসমত বিজেপিৰ চৰকাৰ গঠন হোৱাৰ পিছত ইয়াৰ প্ৰত্যক্ষ প্ৰভাৱ পৰিল বিটিআৰত ৷ ইতিমধ্যেই ৯০ দশকৰ ৰক্তাক্ত ইতিহাসক লৈ বীতশ্ৰদ্ধ হৈ পৰিছিল বড়োলোকসকল ৷ ৰাষ্ট্ৰীয় প্ৰেক্ষাপটত বড়ো লোকসকলৰ অস্তিত্ব জাহিৰ কৰাটো হৈ পৰিল আৱশ্যম্ভাৱী ৷ ৰাজনৈতিক খোৱা-কামোৰা, ৰাজনৈতিক পাশাখেলে বিৰক্ত কৰা ইমানুৱেল মুছাহাৰীয়ে ২০২১ চনৰ ২২ নৱেম্বৰত প্ৰা. ৫০০০ সমৰ্থকৰ উপস্থিতিত বিশ্বৰ সৰ্ববৃহৎ ৰাজনৈতিক দল বিজেপিত যোগদান কৰে আৰু অঞ্চলটোক ৰাষ্ট্ৰীয় দৰবাৰত প্ৰতিষ্ঠা কৰাৰ বাট মুকলি কৰে ৷ কৃষিজীৱি পৰিয়ালৰ সন্তান ইমানুৱেল মুছাহাৰীয়ে তামোলপুৰ সমষ্টিক উদ্যোগীকৰণৰ ক্ষেত্ৰত আগবঢ়াই লৈ যোৱাৰ বাবে বিজেপিকেই সৰ্বশ্ৰেষ্ঠ মঞ্চ বুলি গণ্য কৰিলে ৷
সমষ্টিটোৰ ৰাইজৰ মাজত অত্যন্ত জনপ্ৰিয় নেতা ইমানুৱেল মুছাহাৰীৰ দৃষ্টি বৰ্তমান বড়ো সমাজকে ধৰি অঞ্চলটোৰ অনা-বড়োলোকসকলৰ উন্নয়নত নিৱদ্ধ ৷ দীৰ্ঘদিন ধৰি অঞ্চলটোৰ ৰাইজৰ অভাৱ-অভিযোগ নিৰ্মূলৰ প্ৰতি নেতাগৰাকী সদায়েই সচেতন ৷ মুছাহাৰীৰ দৰে নেতা এজন লাভ কৰি সমষ্টিবাসীও আশ্বস্ত ৷ আঞ্চলিক ৰাজনীতিৰ পৰা ৰাষ্ট্ৰীয় ৰাজনৈতিক দলত খোজ পেলোৱা ইমানুৱেল মুছাহাৰীয়ে দায়িত্ব সহকাৰে আগন্তুক বৰ্ষসমূহত আগবাঢ়ি যাব বুলি আশাবাদী অঞ্চলটোৰ বাসিন্দাসকল ৷
