অসম চৰকাৰৰ বন বিভাগৰ কৰ্মৰত অৰাজপত্ৰিত কৰ্মচাৰী সকলৰ একমাত্ৰ আৰু উমৈহতীয়া সংগঠন “অসম বন কৰ্মচাৰী সন্থা”ৰ সদ্যসমাপ্ত জালুকবাৰী অধিবেশনত নিৰ্বাচিত হোৱা নতুন ৭১ জনীয়া কাৰ্যনিৰ্বাহক সমিতিখনে অলপতে অসম ৰাজ্যিক চিৰিয়াখানা চৌহদৰ হাৰ্বেৰিয়াম হলত আয়োজিত এক অনুষ্ঠানত কাৰ্যভাৰ গ্ৰহণ কৰে। এই উপলক্ষে সন্থাৰ বিদায়ী সমিতিৰ সভাপতি ৰাজেন্দ্ৰ শইকীয়াৰ সভাপতিত্বত অনুষ্ঠিত সভাখনৰ আঁত ধৰে বিদায়ী সাধাৰণ সম্পাদক পুলিন মহন্তই। অনুষ্ঠানত বিদায়ী সভাপতি আৰু সাধাৰণ সম্পাদকে সন্থাৰ নৱনিৰ্বাচিত সভাপতি হোমেন পেগু আৰু সাধাৰণ সম্পাদক ৰাহুল বৰাক আগন্তক কাৰ্যকালৰ বাবে দায়িত্বভাৰ অৰ্পণ কৰে। অনুষ্ঠানত নৱনিৰ্বাচিত কাৰ্যকৰী সমিতিৰ উপ সভাপতি ছাঁয়ামণি দাস, গোপী ছেত্ৰী, জয় কুমাৰ দেউৰী, সহকাৰী সাধাৰণ সম্পাদক পাহাৰী হাজৰিকা , জয়ন্ত কলিতা আৰু ৰূপম বৰুৱাকে ধৰি ভালেকেইজন কৰ্মকর্তা উপস্থিত থাকে।
কাৰ্যভাৰ গ্ৰহণ কৰাৰ পাছত সন্থাৰ নৱনিৰ্বাচিত সভাপতি হোমেন পেগুৰ সভাপতিত্বত অনুষ্ঠিত সভাত কেবাটাও সিদ্ধান্ত গ্ৰহণ কৰা হয়। তাৰ ভিতৰত ২০১৮ চনৰ পৰা বন্ধ হৈ থকা উপ বন সৎপালক তথা ডেপুটী ৰেঞ্জাৰৰ পদোন্নতি শীঘ্ৰে আৰম্ভ কৰা, বন বিভাগত পদ সমূহৰ পুনৰ গঠন প্ৰক্ৰিয়া আৰম্ভ কৰি বিভাগটোক গতিশীল কৰাৰ বাবে বন বিভাগৰ উৰ্ধতম কৰ্তৃপক্ষক দাবী জনোৱা হয় । সন্থাৰ সভাপতি হোমেন পেগুৱে সদৰি কৰা অনুসৰি ডেপুটী ৰেঞ্জাৰ সকলক ৰেঞ্জাৰ পদলৈ পদোন্নতি নিদিয়া বাবে বহু বনপালক ডেপুটী ৰেঞ্জাৰ নোহোৱাকৈয়ে অৱসৰ গ্ৰহণ কৰিব লগা হৈছে। তেনেদৰে ডেপুটী ৰেঞ্জাৰৰ পদোন্নতি বন্ধ হৈ থকা বাবে বহু বনপালক ডেপুটী ৰেঞ্জাৰ আৰু বহু বনৰক্ষীয়ে দক্ষতা, যোগ্যতা আৰু অভিজ্ঞতা থকা স্বত্বেও প্ৰাপ্য পদোন্নতিৰ পৰা বঞ্চিত হব লগা হৈছে। আনকি পদোন্নতি অবিহনে ৰাজ্যৰ বন বিভাগত শতাধিক বনৰক্ষী, বনপালক আৰু ডেপুটী ৰেঞ্জাৰে অৱসৰ গ্ৰহণ কৰিব লগা হৈছে । যাৰ বাবে সন্থাই শীঘ্ৰে পদোন্নতি আৰু পুনৰ গঠন প্ৰক্ৰিয়া আৰম্ভ কৰিবলৈ বন বিভাগৰ প্ৰধান মুখ্য বন সংৰক্ষক আৰু বন বাহিনীৰ মুৰব্বী গৰাকীক আহ্বান জনাইছে বুলি সভাপতি হোমেন পেগুৱে জানিবলৈ দিছে।
