সোমবাৰে জনতা ভৱনৰ বিত্ত বিভাগৰ সভাকক্ষত বিত্তমন্ত্ৰী অজন্তা নেওগৰ অধ্যক্ষতাত আৰু প্ৰশাসনৰ সকলো শীৰ্ষ বিষয়াৰ উপস্থিতিত এক লাখ নিযুক্তি সম্পৰ্কীয় উচ্চস্তৰীয় সমিতিৰ দ্বিতীয়খন বৈঠক অনুষ্ঠিত হয়।এই উচ্চস্তৰীয় বৈঠকত গৃহ বিভাগ, শিক্ষা বিভাগ আৰু স্বাস্থ্য বিভাগত নিযুক্তিৰ ক্ষেত্ৰত অগ্ৰাধিকাৰ প্ৰদান কৰা হ’ব বুলি বিত্তমন্ত্ৰীয়ে জানিবলৈ দিয়ে।
নতুন পদ সৃষ্টি আৰু ৰাইজৰ সেৱাৰ বাবে প্ৰয়োজনীয় তৃতীয় আৰু চতুৰ্থ বৰ্গৰ পদৰ নিযুক্তিত অগ্ৰাধিকাৰ দিয়াৰ পোষকতা কৰে বিত্তমন্ত্ৰী নেওগে।বিভাগসমূহৰ শীৰ্ষ বিষয়াসকলৰ লগত হোৱা আলোচনা মৰ্মে জানিব পৰা যায় যে প্ৰায় ৮০ হাজাৰ খালী পদত নিযুক্তি প্ৰদান কৰিব পৰা যাব।ইয়াৰ লগতে আৰু বহুতো নতুন পদ বিভিন্ন বিভাগত প্ৰয়োজন সাপেক্ষে সৃষ্টি কৰিব পৰা যাব।
এই পূৰণ কৰিবলগীয়া খালী পদৰ হিচাপ আৰু নতুনকৈ সৃষ্টি কৰিবলগীয়া পদসমূহৰ হিচাপ বিভাগসমূহক অহা ৪ দিনৰ ভিতৰত বিত্ত বিভাগত জমা দিবলৈ বিত্তমন্ত্ৰী অজন্তা নেওগে নিৰ্দেশ দিয়ে।এক লাখ পদ পূৰণৰ বাবে বিভাগসমূহে প্ৰতিবেদন বিত্ত বিভাগত দাখিল কৰাৰ পাছত উক্ত বিষয়টো মুখ্যমন্ত্ৰী ড° হিমন্ত বিশ্ব শৰ্মাক অৱগত কৰা হ’ব আৰু নিযুক্তি প্ৰক্ৰিয়াৰ বাবে উপযুক্ত সিদ্ধান্ত লোৱা হ’ব বুলি মন্ত্ৰী নেওগে সদৰি কৰে।
গোটেই বিষয়টো পৰ্যালোচনা কৰি বিত্তমন্ত্ৰীয়ে নিযুক্তি প্ৰক্ৰিয়াৰ প্ৰাৰম্ভিক কাম-কাজৰ ক্ষীপ্ৰ ৰূপায়ণৰ বাবে মুখ্য সচিবৰ তত্বাৱধানত এখন ক’ৰ কমিটি গঠন কৰি দিয়ে।বৈঠকত মন্ত্ৰী অজন্তা নেওগে গোটেই নিযুক্তি প্ৰক্ৰিয়াটোত জড়িত সকলোৱে নিষ্ঠা সহকাৰে তথা নিকা আৰু স্বচ্ছভাৱে সম্পন্ন কৰি চৰকাৰৰ সততাৰ পৰিচয় দিব লাগিব বুলিও বিষয়াসকলৰ উদ্দেশ্যে মন্তব্য প্ৰকাশ কৰে।
