আজি ৫০ বছৰত ভৰি দিলে জনপ্ৰিয় কণ্ঠশিল্পী অসমবাসীৰ হিয়াৰ আমঠু জুবিন গাৰ্গে। ১৯৭২চনৰ ১৮ নৱেম্বৰ অৰ্থাৎ আজিৰ দিনটোতে মেঘালয়ৰ তুৰাত জন্মগ্ৰহণ কৰিছিল অসমবাসীৰ হাৰ্টথ্ৰ’বজনে।
শিল্পীগৰাকীৰ অসংখ্য অনুৰাগীয়ে তেওঁৰ ওপজা দিনটো বিশেষভাৱে উদযাপন কৰিবলৈ প্ৰস্তুতি কৰিছে। প্ৰতিবছৰৰ দৰে অনুৰাগীসকলে এই দিনটোক বিশেষ কৰিবলৈ যত্ন কৰে। আনহাতে, জুবিন ফেন ক্লাবে প্ৰতিবছৰে বিভিন্ন কাৰ্যসূচীৰে মৰমৰ শিল্পীৰ জন্মদিনটো পালন কৰি আহিছে। এই বৰ্ষত যোৰহাটত জুবিনৰ জন্মদিন বৃহৎ আকাৰে পালন কৰাৰ বাবে আয়োজন কৰিছে জুবিন ফেন ক্লাবে। ‘অল আছাম জুবিন গাৰ্গ ফেন ক্লাব’এ আজি যোৰহাটৰ কোৰ্ট ফিল্ডত জুবিন গাৰ্গৰ ৫০তম জন্মদিন উদযাপন কৰিব। এই অনুষ্ঠানত জুবিন গাৰ্গ উপস্থিত থাকিব। এক উৎসৱ মুখৰ পৰিৱেশৰ আয়োজন কৰা হৈছে তেওঁৰ এই বিশেষ দিনটো।
জুবিন গাৰ্গৰ অনুৰাগীয়ে তেওঁৰ ৫০তম জন্মদিনক সোণালী বৰ্ষ হিচাপে উদযাপন কৰিব। সেয়েহে ৫০ পাউণ্ড অৰ্থাৎ ২২.৬ কেজি ওজনৰ এটা কেক কটা হ’ব এই বিশেষ দিনটোত। জুবিনে নিজে ৫০ পাউণ্ডৰ কেকটো কাটিব আৰু আয়োজিত জন্মদিন উদয়াপন কৰিব।
আজিৰ জন্মদিনৰ দিনাখনেই জুবিন গাৰ্গৰ নতুন গীত ‘জিলিকি জিলিকা’ মুক্তি পাব। আগন্তুক ‘ড৹ বেজবৰুৱা ২’ ছবিৰ এই গীতটিত কন্ঠদান কৰিছে জুবিন গাৰ্গে। নিজৰ জন্মদিনত এই নতুন গীতেৰে তেওঁ নিজৰ অনুৰাগীসকলক আগবঢ়াব এক উপহাৰ। লগতে ৰাজ্য তথা দেশৰ বিভিন্ন স্থানত থকা তেওঁৰ অনুৰাগীসকলে বিভিন্ন ধৰণে নিজৰ ভাল লগা শিল্পীজনৰ জন্মদিন পালন কৰিব।
