দেশৰ প্ৰধানমন্ত্ৰী নৰেন্দ্ৰ মোদীয়ে ২০১৪ চনত শাসনভাৰ গ্ৰহণ কৰাৰে পৰা দেশৰ কৃষক সকলৰ উৎপাদন আৰু আয় বৃদ্ধিৰ বাবে কৃষিত বৈজ্ঞানিক পদ্ধতি অৱলম্বন কৰা, কম মাটিত, কম মূলধন আৰু কম সময়ত একেডৰা মাটিত বিজ্ঞানসন্মতভাবে কেবাটাও খেতি কৰি কৃষকে অধিক ধন উপাৰ্জন কৰা আদি ব্যৱস্থা গ্ৰহণ কৰি আহিছে। আনকি ২০১৬ আৰু ২০২১ চনত অসমত মিত্ৰজোঁটৰ চৰকাৰ গঠন হোৱাৰ পাছত প্ৰধানমন্ত্ৰী নৰেন্দ্ৰ মোদীৰ আৰ্হিত কৃষিক্ষেত্ৰত বৈজ্ঞানিক পদ্ধতি প্ৰয়োগ আৰু কৃষকৰ আয় বৃদ্ধি কৰাৰ বাবে ব্যৱস্থা গ্ৰহণ কৰিছে বুলি মন্তব্য কৰে পশ্চিম গুৱাহাটীৰ বিধায়ক ৰমেন্দ্ৰ নাৰায়ণ কলিতাৰ।
আজি সমষ্টিটোৰ ৰাণী উন্নয়ন খণ্ডৰ অধীনৰ গড়গৰাৰ ঢুলঢুলী পথাৰত মুখ্যমন্ত্ৰীৰ সমগ্ৰ গ্ৰাম উন্নয়ন যোজনাৰ ( চি এম এছ জি ইউ ওৱাই ) অধীনত স্থানীয় কৃষকক লৈ গঠন কৰা পখিলা ফাৰ্মাৰ প্ৰদুচিয়াৰ কোম্পানীয়ে ৮০ শতাংশ ৰাজসাহায্যত লাভ কৰা ধান কটা আৰু মৰণা মৰা অত্যাধুনিক প্ৰযুক্তিৰ যন্ত্ৰচালিত কম্বাইন হাৰ্বেষ্টিং বাহন উদ্ধোধন কৰি এই উপলক্ষে অনুষ্ঠিত অনুষ্ঠানত ভাগ লৈ এই মন্তব্য কৰে বিধায়ক ৰমেন্দ্ৰ নাৰায়ণ কলিতাই। বিধায়ক কলিতাই উপস্থিত কৃষক সকলক সম্বোধন কৰি কয় আপোনালোকে পথাৰত বছৰেকত এটা খেতি কৰি বা বহি থাকি মাটি এনেয়ে চন পেলাই নাৰাখিব। তাতকৈ সকলোৱে লগ হৈ সমবায় ভিত্তিত সেই মাটিত বিজ্ঞানসন্মত ভাৱে বৈজ্ঞানিক পদ্ধতি প্ৰয়োগ কৰে কেবাটাও খেতি কৰক। দেখিব আকাশৰ পৰা টকা উৰি আহি আপোনাৰ হাতত পৰিছে। এই কম্বাইন হাৰ্বেষ্টিং যন্ত্ৰৰ সহায়ত যিহেতু এদিনতে ৫০ বিঘাতকৈ অধিক মাটিৰ ধান কম খৰছ, কম সময়ৰ ভিতৰতে খেতিপথাৰতে কাটি, মৰণা মাৰি ঘৰলৈ নিব পাৰি বাবে এই সুবিধা গ্ৰহণ কৰিবলৈ বিধায়ক কলিতাই আহ্বান জনায়।
বিধায়ক কলিতাই ৰাণীৰ কৃষি পথাৰত পানী যোগান ধৰাৰ বাবে জলসিঞ্চন বিভাগৰ জৰিয়তে ২৫ কোটি টকাৰ আঁচনি গ্ৰহণ কৰা, কোনো ধৰণৰ মধ্যভোগী নোহোৱাকৈ কৃষকৰ পৰা চৰকাৰে পোনপটীয়াকৈ প্ৰতি কুইণ্টলত ২,০৫০ টকাকৈ ধান ক্ৰয় কৰা আদি বিভিন্নজনে বিষয়ত আলোকপাত কৰে। আনহাতে কোম্পানীৰ সঞ্চালক ফুলেন চন্দ্ৰ দাসে সঞ্চালনা কৰা সভাত ৰাণী কৃষি চক্ৰৰ কৃষি উন্নয়ন বিষয়া বৰ্ণালী মেধিয়ে কম্বাইন হাৰ্বেষ্টিং যন্ত্ৰৰ উপকাৰীতা, আৰ্থিক লাভালাভৰ দিশ আদিৰ ওপৰত আলোকপাত কৰে। সভাত অগপৰ কেন্দ্ৰীয় সমিতিৰ সম্পাদক সুভাষ শৰ্মা, কামৰূপ জিলা সমিতিৰ সম্পাদক পৰেশ বৰুৱা , পশ্চিম গুৱাহাটী বিধান পৰিষদৰ সাধাৰণ সম্পাদক ৰবীন দৈমাৰী, দক্ষিণ ভোলাগাওঁ আঞ্চলিক সমিতিৰ সভাপতি কন্দৰ্প ৰাভা, কাৰ্যকৰী সভাপতি জয়ন্ত কলিতা, উত্তৰ ভোলাগাওঁ গাঁও পঞ্চায়তৰ সভানেত্ৰী মঞ্জু কলিতা, গাঁওপ্ৰধান ক্ৰমে ধীৰেণ পাঠক, গুণ ডাকুৱা, অমৰেন্দ্ৰ পাটোৱাৰীকে ধৰি কেবাজনো বিশিষ্ট লোক আৰু ডেৰ শতাধিক কৃষক উপস্থিত থাকে। সভাৰ আঁত ধৰে কোম্পানীৰ কৰ্মকর্তা কনক কলিতাই। সভাৰ পাছত কাষৰীয়া গোৱালহাটী পথাৰত কম্বাইন হাৰ্বেষ্টিং বাহন খনৰ সহায়ত ধান কটা আৰু মৰণা মৰা পৰ্বৰ শুভাৰম্ভ কৰা হয়।
