শিক্ষামন্ত্ৰী ডাঃ ৰণোজ পেগুৱে আজি বঙাইগাঁৱত শিক্ষা বিভাগৰ মাণ্ডলিক সন্মিলনত অংশ লৈ শিক্ষকতাৰ লগত জড়িত ব্যক্তিক স্ব-ইচ্ছাই সাংবাদিকতা নতুবা আন বৃত্তি ত্যাগ কৰাৰ আহ্বান জনায় ৷ তেওঁ কয় যে, শিক্ষক-শিক্ষয়িত্ৰীসকলে সাংবাদিকতা নতুবা আন বৃত্তিত জড়িত থকাৰ বাবে নিলম্বনেই ইয়াৰ বাবে সমাধান নহয় ৷ স্ব-ইচ্ছাই আন বৃত্তি ত্যাগ কৰি সকলোৱে শিক্ষকতাত মনোনিৱেশ কৰা উচিত।
আনহাতে পৰিয়ালৰ সদস্যৰ নামতো যদি একাংশই সাংবাদিকতা কৰি থকাৰ অভিযোগ পালেও চৰকাৰে ইয়াৰ বিৰুদ্ধে ব্যৱস্থা গ্ৰহণ কৰিব বুলি তেওঁ জানিবলৈ দিয়ে। ইফালে, ছাত্ৰ-ছাত্ৰী অনুপাতে বেছি শিক্ষক থকা বিদ্যালয়সমূহৰ পৰা কম শিক্ষক থকা বিদ্যালয়লৈ শীঘ্ৰে বদলিকৰণ আৰম্ভ কৰিব বুলি মন্ত্ৰী ডাঃ পেগুৱে জানিবলৈ দিয়ে ৷ বিদ্যালয়সমূহত স্থায়ী শিক্ষক -শিক্ষয়িত্ৰীৰ পদ সৃষ্টিৰ বাবেও চিন্ত চৰ্চা কৰি থকা বুলি মন্ত্ৰীজনে জনাইছে ৷