নিউজ ডেস্কঃ গৰ্ভৱতী মহিলা আৰু নৱজাতকৰ সুৰক্ষাক লৈ চৰকাৰে কেইবাখনো আঁচনি ৰূপায়ণ কৰিলেও বাস্তৱত ভেকোঁভাওনাত পৰিণত হৈছে এনে সকলো আঁচনি।
স্বাস্থ্য বিভাগৰ হেমাহিৰ বাবে শিলচৰ মেডিকেল কলেজ হাস্পতালত এগৰাকী মহিলাই সন্তান জন্ম দিয়াৰ পিছতে মৃত্যুক সাৱটি ল’ব লগা হোৱা বুলি অভিযোগ উত্থাপন হৈছে।
ছ’চিয়েল মিডিয়াতো এই অভিযোগ লৈ ইতিমধ্যে ভাইৰেল হৈ পৰিছে এটা ভিডিঅ’।
অভিযোগ অনুসৰি, শিলচৰ মেডিকেল কলেজ হাস্পতালৰ প্ৰসূতি বিভাগত এখন বিছনাৰে দুগৰাকীকৈ প্ৰসূতিক ৰাখি চিকিৎসা প্ৰদান কৰা হৈছে।
এই লৈ প্ৰসূতিৰ পৰিয়ালে চিকিৎসক-নাৰ্ছৰ ওচৰত অভিযোগ দাখিল কৰিলেও চিকিৎসক-নাৰ্ছৰ পৰা দুৰ্বব্যৱহাৰহে লাভ কৰিবলগা হৈছে।
একেখন বিছনাতে দুগৰাকীকৈ প্ৰসূতিয়ে প্ৰসৱ যন্ত্ৰণাত চটফটাই থকাৰ পিছতো চিকিৎসক-নাৰ্ছে কোনো সঠিক চিকিৎসা প্ৰদান নকৰাৰ বাবেই নিয়তী শুক্লবৈদ্য নামৰ প্ৰসূতি গৰাকীয়ে এটি কন্যা সন্তান জন্ম দিয়েই মৃত্যুমুখত পৰে বুলি অভিযোগ তুলিছে প্ৰসূতিগৰাকীৰ ভাগিন বাবলী শুক্লবৈদ্যই।
চিকিৎসালয়খনৰ এনে তুগলগী কাণ্ডৰ বিৰু্দ্ধে এতিয়া বিহিত ব্যৱস্থা গ্ৰহণ কৰিবলৈ ৰাজ্যিক স্বাস্থ্যমন্ত্ৰী পীয়ুষ হাজৰিকাৰ ওচৰত দাবী জনাইছে প্ৰসূতিগৰাকীৰ পৰিয়ালে।
