নিউজ ডেস্কঃ বাক্সা জিলাৰ তামূলপুৰত দুৰ্বৃত্তৰ গুলীচালনাৰ ঘটনাক লৈ সৃষ্টি হৈছে আতংকৰ। সোমবাৰে নিশা তামূলপুৰৰ মেশগুৰী পুখুৰীপাৰৰ কৃষ্ণ দাস নামৰ এজন ব্যক্তিৰ ঘৰত প্ৰৱেশ কৰি ভয় ভাবুকি প্ৰদান কৰাৰ লগতে গুলীচালনা কৰে তিনিজনীয়া দুৰ্বৃত্তৰ দলে।
কৃষ্ণ দাসে জানিবলৈ দিয়া মতে দুৰ্বৃত্তৰ দলটোৱে মুখত ক’লা কাপোৰ বান্ধি আহিছিল। নিদ্ৰাৰত কৃষ্ণ দাস আৰু পৰিয়ালটোৰ বাকীবোৰ সদস্যক টোপনিৰ পৰা জগাই দুৰ্বৃত্তৰ দলটোৱে ভয় ভাবুকি প্ৰদান কৰে। যেতিয়া পৰিয়ালটোৱে হৈ-হাল্লা কৰি ওচৰ চুবুৰীয়াক জগাবলৈ চেষ্টা কৰে, তেতিয়া দুৰ্বৃত্তৰ দলটোৱে কেইবা জাই গুলি চালনা কৰি পলায়ন কৰে।
পিছত নিশাই ঘটনাস্থলীত আৰক্ষীৰ দল উপস্থিত হৈ ঘৰৰ ভিতৰৰ পৰা এটা 9mm পিষ্টলৰ গুলীৰ অৱশিষ্ট উদ্ধাৰ কৰিবলৈ সক্ষম হয়। আৰক্ষীয়ে পৰিয়ালৰ অভিযোগৰ ভিত্তিত গোচৰ ৰুজু কৰি তদন্ত আৰম্ভ কৰিছে যদিও এতিয়াও দুৰ্বৃত্তৰ দলটোৰ সন্ধান উলিয়াব পৰা নাই।
