নিউজ ডেস্কঃ বিটিচিত আজি দ্বিতীয় পৰ্যায়ৰ ভোটগ্ৰহণ প্ৰক্ৰিয়া আৰম্ভ হৈছে। পৰ্যাপ্ত সুৰক্ষা আৰু ক’ভিড প্ৰট’কলৰ মাজেৰে আৰম্ভ হৈছে ভোটদান প্ৰক্ৰিয়া। কোকৰাঝাৰ আৰু চিৰাং জিলাৰ ১৯টা পৰিষদীয় সমষ্টিত আজি ১০,২৩,৪০৪ গৰাকী ভোটাৰে নিৰ্ণয় হ’ব ১১১ গৰাকী প্ৰাৰ্থীৰ ভাগ্য। এতিয়ালৈ বিটিচিত ভোটদানৰ হাৰ ১২ শতাংশ সম্পন্ন হৈছে ৷
উল্লেখযোগ্য যে যোৱা ৭ ডিচেম্বৰত প্ৰথম পৰ্যায়ত বাক্সা আৰু ওদালগুৰি জিলাত অনুষ্ঠিত হয় ভোটগ্ৰহণ। প্ৰায় ৭৭ শতাংশ ভোটদান কৰে জিলা দুখনৰ ২১টা পৰিষদীয় সমষ্টিত। প্ৰথম পৰ্যায়ৰ ভোটগ্ৰহণ সুকলমে অনুষ্ঠিত হৈ যোৱাৰ পিছত আজি পুৱা ৭ বজাৰ পৰা অনুষ্ঠিত হৈছে ভোটগ্ৰহণ প্ৰক্ৰিয়া ।
অহা ১২ ডিচেম্বৰত ঘোষণা কৰা হ’ব বিটিচিৰ ফলাফল।
