মনত আছেনে ‘মন যায়’ ছবিখনৰ কথা। তাত জুবিন গাৰ্গক আপুনি কি ৰূপত দেখা পাইছিল? শান্তভাৱে একেখন বেঞ্চতে বহি সদায় চাইছিল ছবিখনৰ অভিনেত্ৰীগৰাকীক। কিন্তু সেই শান্ত-শিষ্ট জুবিন গাৰ্গ এতিয়া মহাদুষ্ট। প্ৰায়ে যুৱতী-মহিলাৰ দেহক লৈ দৃষ্টিকটু মন্তব্য কৰা দেখা পোৱা যায়। গীততে হওক বা মঞ্চতে হওক সকলোতে জুবিনৰ নাৰীৰ প্ৰতি থকা দুৰ্বলতা প্ৰকাশ পাই আহিছে।
‘বাটি ভৰাই চিৰা খাবি’ৰ পৰা আৰম্ভ কৰি আৰু বহুকেইটা গীততে জুবিনে বহু বিতৰ্কিত শব্দ ব্যৱহাৰ কৰি আহিছে। মঞ্চত গীত পৰিৱেশনৰ মাজতে কেইবাবাৰো জুবিন গাৰ্গে ‘কেলা’ৰ দৰে শব্দও ব্যৱহাৰ কৰা দেখা পোৱা গৈছিল।
২০১৯ৰ এক অনুষ্ঠানত জুবিনে ‘জাতি-মাটি-ভেটি আৰু তাৰ পিছত এইটোহে…থাকিব আৰু’ বুলি মন্তব্য প্ৰদান কৰিছিল।
মঞ্চ, গীত বাদে দিলো বাৰু কাৰণ আমি ইমানদিনে বাদে দি আছিলো জুবিন গাৰ্গৰ সকলো কথা। কিন্তু ২০২১ৰ প্ৰাগ চিনে এৱাৰ্ডত জুবিনে কৰা কাণ্ড আমি জানো আওকাণ কৰিব পাৰো।
কাৰণ অনুষ্ঠানৰ মাজতে জুবিনে অভিনেত্ৰী নিশিতা গোস্বামীক লৈ শ্ৰুতিকটু মন্তব্য কৰা দেখা গ’ল। এখন অসমীয়া ছবিত অভিনয়ৰ উদ্ধৃতি দি জুবিনে নিশিতাক লৈ কয়, ‘গোটেই চিনেমাখনত মই তাইৰ –––টোৱে দেখা পালো। তাই খোজ কাঢ়ি গৈ থাকে, মই পাছফালৰ চাই থাকো…।’ইতিমধ্যে জুবিনৰ এই মন্তব্যৰ ভিডিঅ’ ছচিয়েল মিডিয়াত ভাইৰেল হৈ পৰাৰ লগতে বিভিন্নজনে সমালোচনাও কৰা দেখা গৈছে। ইয়াৰ পিছতে ৰাজ্যিক মহিলা আয়োগে ইতিমধ্যে আৰক্ষী সঞ্চালক প্ৰধানলৈ এক পত্ৰযোগে জুবিনৰ বিৰুদ্ধে উচিত ব্যৱস্থা গ্ৰহণৰ আহ্বানো জনাইছে।
কেৱল অভিনেত্ৰী নিশিতা গোস্বামীয়ে নহয় অভিনেত্ৰী প্ৰস্তুতি পৰাশৰক লৈও কৰা মন্তব্যই জুবিনৰ মহিলাৰ প্ৰতি থকা আসক্তিয়ে প্ৰকাশ পাইছে। প্ৰস্তুতি পৰাশৰ যেতিয়া মঞ্চৰ ওপৰলৈ উঠি আহিছিল তেতিয়া জুবিনৰ মুখত শুনিব পোৱা গৈছিল “অ মা”। এই শব্দটো শুনি প্ৰস্তুতিয়ে জুবিনক কৈছিল কি ‘অ মা’? পিছত যেতিয়া প্ৰস্তুতিয়ে জুবিনক কান্ধত ধৰিবলৈ ওলাইছিল সেই সময়তো জুবিনৰ মুখৰ পৰা ওলাইছিল অশ্লীল ভাষ্যয়ে। ‘বুকুয়ে বুকুয়ে মাৰ’- এই তুচ্ছ মন্তব্যৰে প্ৰস্তুতিক আদৰিছিল মঞ্চলৈ।
‘সুন্দৰী আৰু গাভৰু যুৱতী লাগে জুবিনক। জুবিনে বুঢ়ী ছোৱালীৰ লগত থাকি ভাল নাপায়।’- এয়া আমাৰ কথা নহয়, এই কথা খোদ জুবিন গাৰ্গে কৈছে। ‘মিছন চাইনা’ৰ প্ৰচাৰ অভিযানৰ মাজতে জুবলী আৰু জুবিনৰ গীত গোৱা প্ৰসংগত সাংবাদিকে সোধা প্ৰশ্নৰ উত্তৰত জুবিনে জুৱলীক লৈ কৈছিল- ‘১২ বছৰ গালে আৰু কিমান গাব আৰু বুঢ়ীয়ে হ’ব আৰু। মোক বুঢ়ী ছিংগাৰ নালাগে।’
ধেমালিতে হওক বা অন্য কিবাই হওক জুবিনে কৰ পৰা পালে ইমান অধিকাৰ, ইমান সাহস? বছৰ বছৰ ধৰি জুবিনৰ এই কৰ্মকাণ্ড আওকাণ কৰিয়েই আহিছো। কিন্তু কথাতে কয় নহয়- “কথাতে কটা যায়, কথাতে বঁটা পায়।” সেয়া জুবিনে বৰ্তমান নিজেই প্ৰমাণ কৰিছে।
এয়াই প্ৰথম নহয় জুবিনৰ ইয়াৰ পূৰ্বেও বহুবাৰ জিভা পিছলিছিল, বহুবাৰ এনেধৰণৰ কাণ্ডয়ে কৰিলে। কিন্তু অসমৰ ল’ৰা বুলি, অসমৰ শিল্পী বুলি আমি জানো বাৰে বাৰে ক্ষমা কৰি দিব পাৰো। জুবিন গাৰ্গৰ এই কৰ্মকাণ্ড কিমান গ্ৰহণযোগ্য বুলি আপোনালোকে ভাৱে?
আমিও জুবিন বিৰোধী নহয় কিন্তু জনপ্ৰিয় হ’ল বুলিয়েই, জনপ্ৰিয়তাৰ আঁৰত তেওঁ কৰা এই কাণ্ড কিমান যুক্তিকৰ? জনাওক আমাক।
Photo: Google
