অসম অভিযান্ত্ৰিক মহাবিদ্যালয়ৰ নতুন ভাৰপ্ৰাপ্ত অধ্যক্ষ হিচাপে বৰ্তমান মহাবিদ্যালয়খনৰে অধ্যাপক ড৹ কল্যাণ কলিতাক দায়িত্ব দিয়া হৈছে। ৰাজ্যৰ উচ্চ শিক্ষা বিভাগ (কাৰিকৰী)ৰ তৰফৰ পৰা এক নিৰ্দেশনাযোগে এই কথা জনোৱা হৈছে। উল্লেখ্য যে, ড৹ কল্যাণ কলিতাৰ নিযুক্তিত ৰাজ্যপালে অনুমোদন জনাইছে। ড৹ কল্যাণ কলিতা হৈছে অসম অভিযান্ত্ৰিক মহাবিদ্যালয়ৰ মেকানিকেল ইঞ্জিনিয়াৰিঙৰ মুৰব্বী অধ্যাপক। বৰ্তমানৰ অধ্যক্ষ ড৹ অতুল বৰাৰ পৰা ড৹ কল্যাণ কলিতাই অধ্যক্ষৰ দায়িত্বভাৰ গ্ৰহণ কৰিব লাগিব।
ইয়াৰোপৰি পৰৱৰ্তী আদেশ নহা পৰ্যন্ত ড৹ অতুল বৰাক তাৎক্ষণিকভাৱে ছুটীত যাবলৈ নিৰ্দেশনা দিয়াৰ লগতে ৭ নং হোষ্টেলৰ ৱাৰ্ডেন ড৹ শশাংক শেখৰ শৰ্মাকো বাধ্যতামূলক ছুটীত যাবলৈ নিৰ্দেশনাটোত উল্লেখ কৰা হৈছে।
শেহতীয়াকৈ মহাবিদ্যালয়খনৰ ৭জন ছাত্ৰৰ এক পথ দুৰ্ঘটনাত মৃত্যু হৈছিল আৰু বৰ্তমান গুৰুতৰভাৱে আহত ৩ জন ছাত্ৰ চিকিৎসাধীন হৈ আছে। দৰাচলতে, ছাত্ৰ কেইজনে মহাবিদ্যালয়ৰ আৱাসত ৰাতি নথকাৰ কথা কৰ্তৃপক্ষই অভিভাৱক নজনোৱাকলৈও বিভিন্নজনে প্ৰশ্ন উত্থাপন কৰিছে। ছাত্ৰ কেইজনৰ ২৮ তাৰিখে ৰাতি দুৰ্ঘটনাত পতিত হৈছিল।
