সুদীৰ্ঘ বছৰ ধৰি মহানগৰীৰ পশ্চিম প্ৰান্তৰ জনসাধাৰণে যাতায়তৰ ক্ষেত্ৰত চিটিবাছ সেৱাৰ পৰা বঞ্চিত হৈ আছিল। কিন্তু মঙলবাৰৰ পৰা চিটিবাছ সেৱা ধাৰাপুৰ চাৰিআলি চ’কলৈ সম্প্ৰসাৰণ হোৱাত বিশেষকৈ মহানগৰীৰ পশ্চিম প্ৰান্তৰ জনসাধাৰণ স্বাভাৱিকতে আনন্দিত হৈ পৰিছে।
উল্লেখনীয় যে পূৰ্বতে একাংশ চিটিবাছ মহানগৰীৰ ভিন্ন প্ৰান্তৰ পৰা লংকেশ্বৰলৈ চলাচল কৰি আছিল যদিও মহানগৰীৰ পশ্চিম প্ৰান্তৰ ছাত্র-ছাত্রীকে ধৰি সৰ্বসাধাৰণ নাগৰিকে মহানগৰীৰ ভিন্নস্থানলৈ যাবলগীয়া হ’লে ভীষণ হাৰাশাস্তিৰ সন্মুখীন হ’বলগীয়া হৈছিল। মহানগৰীৰ পশ্চিম অঞ্চলৰ জনসাধাৰণে প্ৰথমে মেজিক জাতীয় লঘু বাহনেৰে জালুকবাৰী কিম্বা আদাবাৰীলৈ গৈ তাৰপৰা পুনৰ চিটিবাছেৰে গন্তব্যস্থানলৈ যাত্ৰা কৰে। যাত্ৰী সকলে এনেধৰণে যাতায়ত কৰাৰ ফলত অধিক ভাড়া আদায় দি অহাৰ লগতে যথেষ্ট মূল্যবান সময় অপব্যয় কৰি আহিছিল। কিন্তু শেহতীয়া ভাবে কামৰূপ মহানগৰ জিলা প্ৰশাসন আৰু জিলা পৰিবহণ বিভাগৰ যৌথ উদ্যোগত তথা মেট্ৰ’ ট্ৰেন্সপোৰ্ট এছোচিয়েচন, গুৱাহাটীৰ সহযোগত গুৱাহাটী মহানগৰীৰ ভিন্ন পথত চলাচল কৰি থকা চিটিবাছ সমূহৰ চলাচল ধাৰাপুৰ চাৰিআলিলৈ মঙলবাৰৰ পৰা আনুষ্ঠানিক ভাৱে সম্প্ৰসাৰণ কৰা হয়। কামৰূপ মহানগৰ জিলাৰ আঞ্চলিক পৰিবহণ প্ৰাধিকৰণৰ সচিব তথা জিলা পৰিবহণ বিষয়া ৰফিকুল ইছলাম, কামৰূপ মহানগৰ জিলাৰ পশ্চিম মণ্ডলৰ সহকাৰী আৰক্ষী আয়ুক্ত (যানবাহন) ডঃ অনুপজ্যোতি বৰা আৰু কামৰূপ মহানগৰ জিলাৰ এনফৰ্চমেণ্ট ইন্সপেক্টৰ নিতুল চেতিয়াৰ উপস্থিতিত আজি ধাৰাপুৰ চাৰিআলিৰ বাছ আস্থানটো আনুষ্ঠানিকভাৱে মুকলি কৰা হয়।
জিলা পৰিবহণ বিষয়া ৰফিকুল ইছলামে এই সন্দৰ্ভত জানিবলৈ দিয়া মতে মহানগৰীৰ চন্দ্ৰপুৰৰ পৰা চলাচল কৰি থকা ৩৫ নং চিটিবাছ সেৱা, বশিষ্ঠ মন্দিৰৰ পৰা এ টি ৰোড হৈ চলাচল কৰি থকা ৩৬ নং চিটিবাছ সেৱা, বশিষ্ঠ মন্দিৰৰ পৰা চিৰিয়াখানা হৈ চলাচল কৰি থকা ৩৭ নং চিটিবাছ সেৱা , নাৰেংগিৰ পৰা উজানবজাৰ হৈ চলাচল কৰি থকা ৩৮ নং চিটিবাছ সেৱা, পাঞ্জাবাৰীৰ পৰা চিৰিয়াখানা হৈ চলাচল কৰি থকা ৩৯ নং চিটিবাছ সেৱা আৰু বোন্ধা কলনীৰ পৰা গেট হস্পিতাল হৈ চলাচল কৰি থকা ৪৬ নং চিটিবাছ সেৱা ধাৰাপুৰ চাৰিআলিলৈ চলাচল কৰে।
চিটিবাছ সেৱা মুকলি অনুষ্ঠানত মেট্ৰ’ ট্ৰেন্সপোৰ্ট এছোচিয়েচন, গুৱাহাটীৰ সাধাৰণ সম্পাদক বিপুল কলিতাকে ধৰি বিভাগীয় কেবাগৰাকী কৰ্মকৰ্তা উপস্থিত থাকে। আনহাতে জিলা প্ৰশাসন আৰু জিলা পৰিবহণ বিভাগৰ এনে পদক্ষেপক গুৱাহাটী মহানগৰীৰ পশ্চিম প্ৰান্তৰ জনসাধাৰণে আদৰণি জনাইছে।
