কৃষ্ণচূড়াৰ দেশ হিচাপে পৰিচিত গুৱাহাটী বিশ্ববিদ্যালয় চৌহদত চলিত বৰ্ষৰ আৰম্ভণিৰে পৰা গছ কটা কাৰ্যৰ যেন প্ৰতিযোগিতাহে চলিছে। অসম চৰকাৰে বন বিভাগৰ জৰিয়তে ৰাইজৰ মাজত পৰিবেশ সজাগতা সৃষ্টিৰ লক্ষ্যৰে চেপ্টেম্বৰ মাহত আৰম্ভ কৰিছিল অমৃত বৃক্ষ আন্দোলন। তাৰ বিপৰীতে উত্তৰ পূবৰ প্ৰথমখন উচ্চ শিক্ষাৰ প্ৰতিষ্ঠান গুৱাহাটী বিশ্ববিদ্যালয় চৌহদত আৰম্ভ হৈছে পৰিবেশ ধ্বংস আন্দোলন। এই আন্দোলনৰ প্ৰভাৱত বিগত মে মাহৰ পৰা ছয় মাহ ধৰি বিশ্ববিদ্যালয় চলি আছে অবাধে গছ কাটি পৰিৱেশ ধ্বংস কৰা হৈছে। কৰবাত যদি পথ নিৰ্মাণৰ নামত, আন কৰবাত আকৌ বিদ্যুৎ পৰিবাহী তাৰৰ নিৰাপত্তাৰ নামত গছ কটা হৈছে। কিন্তু সকলোতকৈ ডাঙৰ কথাটো হল প্ৰশাসনিক ভবনৰ লগতে নিৰ্মাণ কৰি থকা এটা তিনি মহলীয়া অট্টালিকাত নিৰ্মাণৰ দায়িত্ব লাভ কৰা ঠিকাদাৰজনে তাত গৃহ নিৰ্মাণত ব্যৱহৃত সামগ্ৰী সৰবৰাহ কৰাৰ নামত সন্মুখৰ উদ্যানখনত গোটেই গছ কাটি পেলোৱাক লৈ বিশ্ববিদ্যালয় চৌহদত তীব্ৰ প্ৰতিক্ৰিয়াৰ সৃষ্টি হৈছে। আনকি বিশ্ববিদ্যালয়খনৰ প্ৰথমগৰাকী সচিব, পণ্ডিত প্ৰবৰ অধ্যাপক ডঃ বিৰিঞ্চি কুমাৰ বৰুৱাই নিজে আগভাগ লৈ স্থাপন কৰা উদ্যানৰ ৮০ শতাংশৰো অধিক গছ কটা হৈছে বিগত চাৰি – পাঁচ মাহত। যত অধ্যাপক ডঃ বিৰিঞ্চি কুমাৰ বৰুৱাই উদ্যানখনত নিজ হাতে ৰোপন কৰা মূল্যৱান চন্দন গছৰ লগতে লগতে কৃষ্ণচূড়াসহ প্ৰায় কুৰিজোপা বিভিন্ন প্ৰজাতিৰ গছ কাটি পেলোৱা হৈছে।
জানিব পৰা মতে বিশ্ববিদ্যালয়ৰ উপাচাৰ্যৰ কাৰ্যাল়য়ৰ বাবে বিগত প্ৰায় ডেৰ বছৰ ধৰি নতুনকৈ এটা তিনি মহলীয়া অট্টালিকা নিৰ্মাণ কৰি থকা হৈছে। নিৰ্মাণৰ দায়িত্ব লাভ কৰা ঠিকাদাৰ জনে প্ৰথম অৱস্থাত প্ৰশাসনিক ভৱনৰ সন্মুখৰে থকা মূল পথ চোৱাৰে ট্ৰাক, ডাম্পাৰ বা আন বাহনৰে সামগ্ৰী সমূহ সৰবৰাহ কৰি আহিছিল। কিন্তু পৰৱৰ্তী সময়ত ঠিকাদাৰ জনে নিজৰ বাহন পোনপটীয়াকৈ অহা-যোৱাৰ সুবিধাৰ বাবে প্ৰশাসনিক ভৱনৰ সীমাৰ দেৱাল ভাঙি নতুনকৈ এটা অস্থায়ী পথ উলিয়াই লয়। মাত্ৰ পাঁচ মিনিটমান সময় বচাবৰ বাবেই ঠিকাদাৰজনে খেয়াল খুচি মতে এখন উদ্যান ধ্বংস কৰি বহু মূল্যবান গছ কাটি পথ মোকোলোৱাক লৈ স্বাভাৱিকতে তীব্ৰ প্ৰতিক্ৰিয়াৰ সৃষ্টি হৈছে। যাৰ বাবে বিশ্ববিদ্যালয়ৰ সচেতন নাগৰিক সমাজে এইক্ষেত্ৰত বিশ্ববিদ্যালয়ৰ আচাৰ্য তথা ৰাজ্যপালক হস্তক্ষেপ কামনা কৰিছে। উল্লেখযোগ্য যে প্ৰায় ছয়মাহ পূৰ্বে ৰাষ্ট্ৰীয় ঘাইপথৰ পৰা অসম অভিযান্ত্ৰিক মহাবিদ্যালয় সংযোগী পথৰ দাঁতিয়েদি সুন্দৰবৰীলৈকে প্ৰায় এক কিল’মিটাৰ অংশত চৌহদৰ ভিতৰৰে নতুনকৈ এটা পথ নিৰ্মাণৰ বাবে প্ৰায় ৩০ জোপাতকৈ অধিক মূল্যৱান গছ কাটি পেলোৱাৰ পাছত তীব্ৰ প্ৰতিক্ৰিয়াৰ সৃষ্টি হৈছিল । আনকি ইয়াৰে কেইবাজোপা গছ বিশ্ববিদ্যালয় স্থাপনৰ সময়তে ৰোপণ কৰা হৈছিল। এই সন্দৰ্ভত প্রকৃতিপ্রেমী লোকসকলে সদৰী কৰা অনুসৰি উন্নয়নমূলক কামত বা পথ নিৰ্মাণৰ নামত গছ-গছনি কাটিবলগীয়া হোৱাটো নতুন কথা নহয়। কিন্তু পৰিৱেশ সংৰক্ষণৰ বাবে এডাল গছ কটাৰ পূৰ্বে দহজোপা গছ ৰোপণ কৰিব লাগে। আনকি দৰকাৰ হ’লৈ গছ নকটাকৈয়ে পথ নিৰ্মাণ কৰিব পাৰি নেকি সেই কার্যতহে অধিক মনোনিৱেশ কৰিব লাগে। কিন্তু অমৃত বৃক্ষ আন্দোলন চলি থকাৰ সময়তে গুৱাহাটী বিশ্ববিদ্যালয় চৌহদত এনে ধৰণৰ গছ কাটি উদ্যান ধ্বংস কৰা কাৰ্যক চৌহদৰ আবাসী সকলে কোনোৱে সহজ ভাবে লোৱা নাই।
