আজি গুৱাহাটীৰ বৰঝাৰস্থিত লোকপ্ৰিয় গোপীনাথ বৰদলৈ আন্তঃৰাষ্ট্ৰীয় বিমানবন্দৰ উদযাপন কৰা হয় আন্তৰাষ্ট্ৰীয় যোগ দিৱস। পুৱা বৰঝাৰ বিমানবন্দৰৰ বিশাল পাৰ্কিং স্থানত বৰঝাৰ বিমানবন্দৰৰ সুৰক্ষাৰ দায়িত্বত নিয়োজিত হৈ থকা কেন্দ্ৰীয় ঔদ্যোগিক সুৰক্ষা বাহিনী আৰু বৰঝাৰ বিমানবন্দৰ কৰ্তৃপক্ষৰ যুটীয়া উদ্যোগত আয়োজন কৰা আন্তৰাষ্ট্ৰীয় যোগ দিৱসত ভাৰতীয় বিমানবন্দৰ প্ৰাধিকৰণৰ বিষয়া-কৰ্মচাৰী সকলৰ লগতে কেন্দ্ৰীয় ঔদ্যোগিক সুৰক্ষা বাহিনীৰ জোৱান তথা বৰঝাৰ বিমানবন্দৰ কৰ্তৃপক্ষৰ বিষয়া-কর্মচাৰী সকলে অংশগ্ৰহণ কৰে।
প্ৰায় দুই শতাধিক লোকৰ উপস্থিতিত অনুষ্ঠিত যোগাসনৰ জৰিয়তে অংশগ্ৰহণকাৰী সকলে শাৰীৰিক আৰু মানসিক উৎকর্ষ সাধনৰ উদ্দেশ্যে বিভিন্ন যোগ আৰু প্রানায়াম প্ৰদৰ্শন কৰে। যোগাসন আৰু প্রানায়ামত বৰঝাৰ বিমানবন্দৰৰ মুখ্য বিমানবন্দৰ বিষয়া উৎপল বৰুৱাৰ লগতে কেন্দ্রীয় ঔদ্যোগিক সুৰক্ষা বাহিনীৰ কামাণ্ডেন্ট লালমোহন ঠাকুৰেও ভাগ লয়। তদুপৰি যোগাসনত অংশ লোৱা লোক সকলৰ মানসিক প্ৰশান্তিৰ লগতে এগৰাকী সুস্থ শৰীৰৰ গৰাকী হোৱাৰ লক্ষ্যৰে বিশ্ব প্ৰসিদ্ধ, প্ৰজাপিতা ব্ৰহ্মকুমাৰী ইশ্বৰীয় বিশ্ববিদ্যালয়ৰ ন্যাসৰক্ষী বি কে ৰাকেশে আধ্যাত্মিক জীৱন দৰ্শন সন্দৰ্ভত এক মননশীল বক্তব্য প্ৰদানৰ লগতে সকলোকে ধ্যান কৰোৱায়।
তদুপৰি বিমানকোঠ কতৃপক্ষৰ ফালৰ পৰা কাঁহিকুচি প্ৰাথমিক বিদ্যালয়ৰ প্ৰাংগনত বহুসংখ্যক ছাত্ৰ-ছাত্ৰী আৰু শিক্ষয়িত্ৰীৰ মাজতো যোগাসন অনুষ্ঠিত কৰা হয়। লগতে বিমানকোঠ কতৃপক্ষই যাত্ৰীসকল মাজত যোগাসনৰ সজাগতা বৃদ্ধিৰ বাবে বিমানকোঠৰ আগমন কক্ষৰ বাহিৰত এখন মুকলি যোগাসন মঞ্চৰ আয়োজন কৰে। য’ত যোগ প্ৰশিক্ষকৰ দ্বাৰা যোগ প্ৰদৰ্শন আৰু জ্ঞানৰ বিনিময় কৰা হয়।
