ধেমাজিৰ চিমেন চাপৰি আৰক্ষী থানাৰ আটকপুৰত লিবাৰেল ডেমক্ৰেটিক কাউঞ্চিল অৱ মিচিংলেণ্ড(LDCM)ৰ এজন সদস্য আৰক্ষীৰ গুলীত নিহত।
উল্লেখ্য ধনদাবী কৰি ১০ মে’ৰ নিশা জোনাইৰ ১নং চিৰামপুৰীয়া গাঁৱৰ গেলামালৰ ব্যৱসায়ী সুভাষ চাহুক অচিনাক্ত দুৰ্বৃত্তই গুলীচালনা কৰি বন্দুকধাৰী দলটো ঘটনাস্থলীৰ পৰা আঁতৰি গৈছিল।
ঘটনাটোৰ পাছদিনাৰ পৰা পৰা আৰক্ষীয়ে চিমেন চাপৰিত LDCMৰ সদস্য গোবিন্দ পেগু (৩৩) আৰু চিলাপথাৰৰ বগীবিল ডাম্বুকৰ ভদীয়াচুকৰ দেবীৰাম পেগু (৩৫)ক আটক কৰে।
তাৰ পিছতে দুয়োকে সোধাপোছা কৰি ঘটনাৰ সৈতে জড়িত মিছামৰাৰ কুমলীয়া গাঁৱৰ বাণীকান্ত কুম্বাঙক ঘৰৰ পৰা আটক কৰে।
আৰক্ষীৰ জেৰাত ধৃত এলডিচিএমৰ সদস্যজনে আটকপুৰত এটা ৰিভলভাৰ পুতি থোৱা বুলি কোৱাৰ ফলত সেই স্থানলৈ লৈ যায়।
পিছত পুতি থোৱা ৰিভলভাৰটো হাতত লৈ আৰক্ষীলৈ লক্ষ্য কৰি গুলী চলাবলৈ লওতে আৰক্ষীৰ গুলীত গুৰুতৰভাৱে আঘাতপ্ৰাপ্ত হয় সদস্যজন।
আহত সদস্যজনক ডেকাপাম ক্ষুদ্ৰ প্ৰাথমিক স্বাস্থ্য কেন্দ্ৰলৈ নিয়া হয় যদিও চিকিৎসকে মৃত ঘোষণা কৰে।
ধৃত এলডিচিএমৰ সদস্যকেইজনৰ পৰা আৰক্ষীয়ে দুখন গ্লেমাৰ, এখন পালচাৰ আৰু এখন বাইক জব্দ কৰে।
ইফালে ঘটনাৰ সৈতে জড়িত ব্ৰজেন দলে (২৭), বিশ্ব দলে(২৬), মনোকুমাৰ পাতিৰ (২৭)ক বুধবাৰৰ নিশাই চিৰামপুৰীয়া গাঁৱত এখন চাৰিচকীয়া বাহনৰ সৈতে আটক কৰে কৰে বুলি ধেমাজি আৰক্ষী অধীক্ষক ডা° ধনঞ্জয় পি ঘনাৱটে এক সংবাদমেল যোগে জানিব দিয়ে।
উল্লেখযোগ্য যে আটকাধীন এলডিচিএমৰ পাঁচ গৰাকী সদস্যক আজি জেললৈ প্ৰেৰণ কৰিছে।
Photo: Headline8
