সময়ে সময়ে পাহাৰত ভূমিস্খলনৰ দৰে ঘটনা সংঘটিত হৈ থকাৰ মাজতে, পুনৰ ভূমিস্খলনৰ ফলত মৃত্যুক সাবতিলে এজন লোকে। হাইলাকান্দি জিলাৰ কৈয়া চাহ বাগিচাত সংঘটিত হৈছে এই ঘটনা।
জানিব পৰা মতে, বুধবাৰে বিয়লি হাইলাকান্দি জিলাৰ কৈয়া চাহ বাগিচাত পাহাৰৰ মাটি কাটি থকা অবস্থাত হঠাৎ ভূমিস্খলন হয়। ভূমিস্খলনৰ ফলত এজন লোক থিতাতে নিহত হয়। লগতে আন দুজন গুৰুতৰ ভাৱে আহত হয়।
ভূমিস্খলনৰ ফলত নিহত হোৱা লোকজনৰ নাম আনোৱাৰ হুছেইন বুলি জানিব পৰা গৈছে। লগতে, আহত হোৱা লোক দুজনৰ নাম ৰতন শুক্লবৈদ্য আৰু ছইদুল ইছলাম লস্কৰ। আহত দুয়োগৰাকী লোক বৰ্তমান হাইলাকান্দিৰ লালা প্ৰাথমিক চিকিৎসালয়ত চিকিৎসাধীন হৈ আছে।
