গুৱাহাটীৰ পশ্চিম প্ৰান্তৰ আজাৰা কাঁহিকুছিস্থিত কৃষি বিজ্ঞান কেন্দ্ৰ (KVK) কামৰূপৰ উদ্যোগত বানপানীৰ পাছত লবলগীয়া ব্যৱস্থাপনাৰ অংশস্বৰূপে কামৰূপ জিলাৰ কমলপুৰ উন্নয়ণ খণ্ডৰ অন্তৰ্গত জালিমুৰা আৰু পিয়লিখাটাত ৩ জুলাইত এটা পশুধন স্বাস্থ্য শিৱিৰৰ আয়োজন কৰা হয়। বিশেষকৈ শেহতীয়া বানত বিস্তৰভাৱে ক্ষতিগ্ৰস্ত অঞ্চল হিচাপে চিহ্নিত জালিমুৰা আৰু পিয়লিখাটা গাঁৱত কে ভি কে আৰু কমলপুৰ খণ্ড পশুধন চিকিৎসালয়ৰ উদ্যোগত অনুষ্ঠিত শিবিৰত পিয়লিখাটা আৰু জালিমুৰা গাঁৱত ক্ৰমে ৩২১ টা পশুধন তথা ৯৬৬ টা হাঁহ-কুকুৰাৰ আৰু ২৫৫ টা পশুধন তথা ১২৪০ টা হাঁহ-কুকুৰাৰ চিকিৎসা প্ৰদান কৰা হয় আৰু লগতে ঔষধ আৰু পৰিপূৰক যোগান ধৰা হয়। শিৱিৰত ভালেসংখ্যক পশুধন বিষাক্ত পাৰ্থেনিয়ামৰ দ্বাৰা আক্ৰান্ত হোৱা পৰিলক্ষিত হয়।
বানপানীৰ সময়চোৱাত ওখ অঞ্চলসমূহো জলমগ্ন হোৱাৰ পৰিপ্ৰেক্ষিতত পশুসমূহৰ গৰাকীৰ সৈতে অস্থায়ী আশ্ৰয় শিৱিৰত থাকিব লগা হয়। দানা আৰু খাদ্যৰ অভাৱত পশুসমূহে পাৰ্থেনিয়াম খোৱাৰ প্ৰভাৱ এই শিৱিৰত স্পষ্টভাৱে পৰিলক্ষিত হয়। ভৱিষ্যতে পাৰ্থেনিয়ামৰ ফলত হ’ব পৰা বিষক্ৰিয়াৰ পৰিত্ৰাণৰ বাবে পাৰ্থেনিয়াম সজাগতা সভাৰ আয়োজন কৰা হয়। কৃষি বিজ্ঞান কেন্দ্ৰ, কামৰূপৰ পশু বিজ্ঞান বিভাগৰ বিষয়বস্তু বিশেষজ্ঞা ড০ ইলাক্ষী ডেকা আৰু কমলপুৰ খণ্ড পশুপালন বিষয়া ড০ অনিল কুমাৰ চৌধুৰীয়ে পাৰ্থেনিয়ামৰ বিষক্ৰিয়া, লক্ষণ আৰু চিকিৎসাৰ ওপৰত আলোকপাত কৰে। শিবিৰত বিজেপিৰ কমলপুৰ মণ্ডলৰ সভাপতি কুমুদ কাকতিকে ধৰি কেবাজনো বিশিষ্ট লোক উপস্থিত থাকে।
