অৱশেষত পলাতক অৱস্থাত থকা মডাৰ্ন স্কুলৰ অধ্যক্ষা জোনালী দাসে গুৱাহাটী উচ্চ ন্যায়ালয়ৰ পৰা অৰ্ন্তৱৰ্তীকালীন অগ্ৰীম জামিন লাভ কৰিবলৈ সক্ষম হ’ল। ঘটনা সংঘটিত হোৱাৰ দিনৰে পৰা পলায়ন কৰি আছিল অভিযুক্তা দাস।
উল্লেখ্য যে, গুৱাহাটীৰ অভিজাত স্কুল মডাৰ্ন ইংলিছ স্কুলৰ এগৰাকী ছাত্ৰীয়ে স্কুল চৌহদতে আত্মহত্যাৰ চেষ্টা কৰিছিল আৰু অৱশেষত চিকিৎসাধীন অৱস্থাত ছাত্ৰীগৰাকীয়ে মৃত্যুবৰণ কৰিছিল। ইতিমধ্যে স্কুল প্ৰাংগণত ছাত্ৰীগৰাকীৰ আত্মহত্যাৰ তদন্ত বিচাৰি পৰিয়ালৰ লোকে প্ৰতিবাদ কৰিছিল আৰু স্কুলখনৰ অধক্ষ্যা জোনালী দাস পৰোক্ষ ভাবে দায়ী বুলি অভিহিত কৰিছিল। আচৰিত ভাৱে এই ঘটনাৰ বিষয়ে নীৰৱতা অৱলম্বন কৰা দেখা গৈছিল স্কুল কৰ্তৃপক্ষক। কাহিলীপাৰাস্থিত মডাৰ্ন ইংলিছ স্কুল কৰ্তৃপক্ষক লৈ সন্দিহান পৰিয়ালৰ লোকে এই ঘটনাৰ বাবে বিদ্যালয়ৰ অধ্যক্ষৰ বিৰুদ্ধে অভিযোগ উত্থাপন কৰিছিল। ছাত্ৰীগৰাকীৰ পৰিয়ালৰ লোকৰ অভিযোগ যে, বিদ্যালয়ৰ অধ্যক্ষাই গালি-শপনি পৰাৰ লগতে ছাত্ৰীগৰাকীক অহৰহ মানসিক হাৰাশাস্তি কৰি আহিছিল।