বিশিষ্ট সাহিত্যিক অতুলানন্দ গোস্বামীৰ দেহাৱসান। বুধবাৰে পুৱতি নিশা প্ৰায় ৪.৪০ মিনিটত GMCHত শেষ নিশ্বাস ত্যাগ কৰে সাহিত্যিক গৰাকীয়ে। মৃত্যুৰ সময়ত তেখেতৰ বয়স আছিল ৮৭ বছৰ। বিগত প্ৰায় ১০ দিন ধৰি GMCH ত চিকিৎসাধীন হৈ আছিল সাহিত্যিকগৰাকী।
উল্লেখযোগ্য যে গল্পকাৰ, অনুবাদক, ঔপন্যাসিক অতুলানন্দ গোস্বামীদেৱৰ জন্ম হৈছিল ১৯৩৫ চনত। ২০১৩ চনত তেওঁক অসম উপত্যকা সাহিত্য বঁটা প্ৰদান কৰা হৈছিল। ‘চেনেহ জৰীৰ গাঁথি’ৰ বাবে ২০০৬ চনত লাভ কৰিছিল সাহিত্য অকাডেমী বঁটা। ‘নামঘৰীয়া’ গোস্বামীৰ আন এখন কালজয়ী উপন্যাস।
এসময়ত গুৱাহাটী দূৰদৰ্শন কেন্দ্ৰ যোগে প্ৰচাৰ হোৱা অতি জনপ্ৰিয় ধাৰাবাহিক ‘নামঘৰীয়া’ আছিল তেখেতৰে বহু জনপ্ৰিয় উপন্যাসৰ নাট্যৰূপ। ১৯৮৯ চনত প্ৰকাশ পাইছিল এই জনপ্ৰিয় গ্ৰন্থখন। অতুলানন্দ গোস্বামী অসমীয়া সাহিত্য জগতৰ এগৰাকী বলিষ্ঠ গল্পকাৰ, ঔপন্যাসিক আৰু বিশিষ্ট অনুবাদক।
‘পলাতক’ নামৰ গ্ৰন্থখন তেওঁৰ প্ৰকাশ হৈছিল ১৯৮৩চনত। তাৰ পিছত ১৯৯৩ চনত প্ৰকাশ হৈছিল ‘আশ্ৰয়’। ‘ককাইদেউ’ নামৰ উপন্যাসখন তেওঁৰ ২০০৯ চনত প্ৰকাশ পাইছিল। ২০১২ চনত প্ৰকাশ হৈছিল তেওঁৰ আন এখন উপন্যাস ‘অৰ্কিড’। অসমীয়া সাহিত্যৰ অন্যতম শক্তিশালী গল্পকাৰ তথা ঔপন্যাসিক অতুলানন্দ গোস্বামীদেৱে কেইবাখনো গ্ৰন্থ অনুবাদো কৰিছে। তাৰ ভিতৰত অন্যতম হ’ল জেমছ হিল্মৰ ‘গুডবাই মিঃ ছিপছ’, টি এছ পিল্লাইৰ ‘পিতা-পুত্ৰ’, প্ৰাণবন্ধু কৰ আৰু মনোজ কুমাৰৰ ‘শ্বেতপম্মা আৰু বনহংসী’, ‘একৈশটা বাংলা গল্প’, বংকিমচন্দ্ৰৰ নিৰ্বাচিত প্ৰবন্ধ আদি।
