ৰাষ্ট্ৰীয় দুৰ্যোগ সহাৰি বাহিনী চমুকৈ NDRFৰ পূব মণ্ডলৰ আন্তঃ বেটেলিয়ান ফুটবল প্ৰতিযোগিতাখন ২৬ আৰু ২৭ ছেপ্টেম্বৰত গুৱাহাটীৰ আজাৰা পাটগাঁওস্থিত প্ৰথম NDRF বেটেলিয়ানৰ উদ্যোগত দুদিনীয়াকৈ দক্ষিণ কামৰূপৰ মিৰ্জাৰ আৰ বি উচ্চতৰ মাধ্যমিক বিদ্যালয়ৰ খেলপথাৰত অনুষ্ঠিত হৈ যায়। প্ৰতিযোগিতাখনত পূৱ মণ্ডলৰ অধীনৰ আজাৰা পাটগাঁওস্থিত প্ৰথম, কলকাতাস্থিত দ্বিতীয়, পাটনাস্থিত নৱম আৰু ইটানগৰস্থিত দ্বাদশসহ চাৰিটা বেটেলিয়ানে ভাগ লয়।
২৭ ছেপ্টেম্বৰত বিয়লি অনুষ্ঠিত ফাইনেল খেলখনত প্ৰথম বেটেলিয়ানে দ্বাদশ বেটেলিয়ানক তিনি – এক গলৰ ব্যৱধানত পৰাজিত কৰি বিজয়ীৰ সন্মান লাভ কৰে। খেলৰ সামৰণিৰ পিছত অনুষ্ঠিত বঁটা বিতৰণি অনুষ্ঠানত মুখ্য অতিথি হিচাপে ভাগ লৈ প্ৰথম NDRF বেটেলিয়ানৰ কমাডেণ্ট এইচ পি এছ কাণ্ডাৰীযে বিজয়ী আৰু ৰানাৰ্ছ আপ দলক ট্ৰফী, পদক আৰু প্ৰমাণ পত্ৰ প্ৰদান কৰে। অনুষ্ঠানত বাহিনীটোৰ কেবাজনো বিষয়া, অধীনস্থ বিষয়া, জোৱান আৰু অঞ্চলটোৰ বহু ক্ৰীড়াপ্ৰেমী লোক উপস্থিত আছিল।
