সম্প্ৰতি উত্তৰ-পূৰ্বাঞ্চল ভ্ৰমণৰত কেন্দ্ৰীয় ৰে’ল মন্ত্ৰী অশ্বিনী বৈষ্ণৱে মঙলবাৰে মালিগাঁওস্থিত উত্তৰ-পূব সীমান্ত ৰে’লৱেৰ অফিচাৰ ক্লাৱত উপস্থিত হৈ উত্তৰ-পূব সীমান্ত ৰে’লৱেৰ মহাপ্ৰবন্ধক আঞ্চুল গুপ্তা তথা শীৰ্ষ বিষয়াৰে সৈতে এক গুৰুত্বপূৰ্ণ বৈঠকত মিলিত হয়। উক্ত বৈঠকত অসম চৰকাৰৰ মন্ত্ৰী চন্দ্ৰমোহন পাটোৱাৰীও উপস্থিত আছিল।
উত্তৰ-পূৰ্বাঞ্চলৰ সৈতে যোগাযোগ ব্যৱস্থা সূচল কৰাৰ পৰিকল্পনা সন্দৰ্ভত বৈঠকত আলোচনা কৰা হয় বুলি সংবাদ মাধ্যমক জনালে কেন্দ্ৰীয় মন্ত্ৰীগৰাকীয়ে। লগতে গুৱাহাটীৰ উপৰিও সমগ্ৰ উত্তৰ-পূবতে ৰে’ল বৈদ্যুতিকৰণৰ কাম দ্ৰুতগতিত চলি থকা বুলি জনায় মন্ত্ৰীগৰাকীয়ে।
ইফালে যানজঁটৰ সমস্যা ৰোধৰ বাবেও লোকনিৰ্মাণ বিভাগৰ সহযোগত ব্যৱস্থা লোৱা হৈছে বুলি জনোৱাৰ উপৰিও ভিষ্টাড’ম ৰে’লৰ সংখ্যা বৃদ্ধিৰ পৰিকল্পনা কৰা হৈছে বুলিও কেন্দ্ৰীয় ৰে’লমন্ত্ৰীগৰাকীয়ে জানিব দিয়ে। উল্লেখ্য যে, আজি মণিপুৰৰ ইম্ফলত কেতবোৰ কাৰ্যসূচীত অংশ ল’ব কেন্দ্ৰীয় ৰে’ল মন্ত্ৰী অশ্বিনী বৈষ্ণৱে।