বৰঝাৰস্থিত লোকপ্ৰিয় গোপীনাথ বৰদলৈ বিমানকোঠৰ নতুন পৰিচালনা প্ৰতিষ্ঠান গুৱাহাটী ইন্টাৰনেশ্যনেল এয়াৰপৰ্ট লিমিটেডে মহিলা যাত্ৰীসকলৰ লগতে অনান্য যাত্ৰীসকলক সহায় কৰিবলৈ কেতবোৰ ব্যবস্থা গ্ৰহণ কৰিছে। তাৰ ভিতৰত উল্লেখযোগ্য ব্যবস্থটো হৈছে, আগমন কক্ষৰ সমুখভাগত ইউনিফৰ্ম পৰিহিত সুৰক্ষাকৰ্মী অহৰ্নিশে মজুত থাকিব। অকলশৰীয়া মহিলা যাত্ৰী নতুবা সহায়ৰ প্ৰয়োজন হোৱা আন যাত্ৰীসকলে টেক্সি নতুবা আন যান-বাহন ভাড়া কৰাৰ সময়ত তেওঁলোকৰ সহায় ল’ব পাৰিব। তদুপৰি, যাত্ৰা কৰি থকাৰ সময়ত কিবা অসুবিধা হ’লে জনাব পৰাকৈ সেই সুৰক্ষাকৰ্মীসকলে তেওঁলোকৰ নাম আৰু মোবাইল নম্বৰ লিখা এটা সৰু কাগজৰ টুকুৰা যাত্ৰীৰ হাতত তুলি দিব। দিনটোত সৰ্বমুঠ তিনিজন সুৰক্ষাকৰ্মীয়ে চৌবিশ ঘন্টাই যাত্ৰীসকলৰ সহায়ৰ নিমিত্তে এই সেৱা প্ৰদান কৰিব। অবশ্যে নিৰ্দিষ্ট সময় পাৰ হৈ যোৱাৰ পিছত এই নম্বৰৰ পৰা বিমানকোঠৰ আন সুবিধা সম্পৰ্কে কোনো তথ্য লাভ কৰিব পৰা নাযাব। ইয়াৰোপৰি অচিৰেই আগমন কক্ষৰ সমুখভাগ চি চি টিভিৰ দ্বাৰা পৰ্যবেক্ষণ কৰি থাকিবলৈ বিমান কোঠটোৰ পৰিচালন সংস্থা গুৱাহাটী ইন্টাৰনেশ্যনেল এয়াৰপৰ্ট লিমিটেডে পৰিকল্পনা কৰিছে।
