পপুলাৰ ফ্রণ্ট অৱ ইণ্ডিয়া চমুকৈ পি এফ আইৰ সাম্প্রতিক কাম-কাজে অসমৰ বাবে ভাবুকি অনা বাবে খোদ ৰাজ্যৰ মুখ্যমন্ত্রী ড০ হিমন্ত বিশ্ব শর্মাই কেন্দ্রীয় চৰকাৰক এই সংগঠনটোক নিষিদ্ধ কৰিবৰ বাবে আহ্বান জনাবলগীয়া পৰিস্থিতি হৈছে৷ শেহতীয়াকৈ ছিপাঝাৰৰ ধলপুৰ গৰুখুঁটিত প্রশাসনে চলোৱা উচেছদৰ সময়ত হোৱা ৰক্তাক্ত পৰিস্থিতিৰ আঁৰত এই সংগঠনটো থকাৰ কথা চোৰাংচোৱাৰ প্রতিবেদনত প্রকাশ পাইছে৷ আনহাতে ‘কা’আন্দোলনৰ সময়তো এই সংগঠনটোৱে অসম ৰক্তাক্ত কৰাৰ বাবে ভয়াৱহ চক্রান্ত কৰাৰ তথ্য তেতিয়া পোহৰলৈ আহিছিল৷ তাৰ পূর্বে পি এফ আয়ে অসমত ৰাষ্ট্রীয় নাগৰিকপঞ্জী উন্নীতকৰণ প্রক্রিয়াত অনুপ্রৱেশকাৰীক ভাৰতীয় প্রতিপন্ন কৰিবৰ বাবে কাম কৰাৰ তথ্যও পোহৰলৈ আহিছে৷ লক্ষণীয় যে ২০০৬ চনত কেৰালাত জন্মলাভ কৰা এই সংগঠনটোৱে সম্প্রতি দেশৰ ২৪ খন ৰাজ্যত শিপা মেলিবলৈ সক্ষম হৈছে৷
কিন্তু, সংখ্যালঘু জনতাৰ উন্নয়নৰ বাবে কাম কৰাৰ নাম লৈ দেশ-বিৰোধী কাম কৰাৰ অভিযোগত ইতিমধ্যে পি এফ আইক কেৰালা আৰু ঝাৰখণ্ড ৰাজ্যত নিষিদ্ধ কৰা হৈছে৷ অসমতো সময়ে সময়ে পৰিস্থিতি উত্তপ্ত কৰাৰ বাবে কাম কৰি থকাৰ একাধিক প্রমাণ পোহৰলৈ অহাৰ পাছত সম্প্রতি মুখ্যমন্ত্রী ড০ হিমন্ত বিশ্ব শর্মাই ইয়াতো সংগঠনটোক নিষিদ্ধ কৰিবৰ বাবে কেন্দ্রৰ দ্বাৰস্থ হৈছে৷ উল্লেখযোগ্য যে, অসমত ২০১৬ চনৰ পৰা পি এফ আয়ে সক্রিয়ভৱে কাম কৰি আছে৷ কিন্তু, এই তিনি বছৰতে সংগঠনটোৱে নামনি অসম আৰু বৰাক উপত্যকাত অতি ক্ষিপ্রভাৱে নিজৰ সাংগঠনিক ভেটি সবল কৰিবলৈ সক্ষম হৈছে৷
বিশেষকৈ মুছলমান জনবসতি অধ্য়ুষিত এলেকাত পি এফ আইৰ ভেটি সবল কৰাৰ বাবে সংগঠনটোৰ কর্মীসকলে দিনে-নিশাই কাম কৰিছে৷ উল্লেখযোগ্য যে পি এফ আইৰ মুখ্য কার্যালয় নতুন দিল্লীত৷ দিল্লীৰ পৰা নিয়ন্ত্রণ কৰা এই সংগঠনটোৱে সম্প্রতি অসমৰ ২১খন জিলাত খোপনি পুতিবলৈ সক্ষম হৈছে৷
ৰাজ্যৰ চোৰাংচোৱা সংস্থাই চৰকাৰক দাখিল কৰা প্রতিবেদন অনুসৰি অসমৰ ২১খন জিলাত সম্প্রতি পি এফ আইৰ মুঠ ১৯ সহস্রাধিক কর্মকর্ সক্রিয় হৈ আছে৷ বিশেষকৈ কামৰূপ আৰু গোৱালপাৰা জিলাৰ উপৰি বৰাক উপত্যকাত পি এফ আইৰ সম্প্রতি সাংগঠনিক ভেটি সবাতোকৈ শক্তিশালী৷ উল্লেখযোগ্য যে ৰাষ্ট্রীয় নাগৰিকপঞ্জী উন্নীতকৰণৰ সময়ত অসমত প্রথমবাৰৰ বাবে ৰাষ্ট্রবিৰোধী কামত লিপ্ত থকাৰ তথ্য পোহৰলৈ আহিছিল৷ এই সংগঠনটোৱেও ৰাষ্ট্রীয় নাগৰিকপঞ্জী উন্নীতকৰণ প্রক্রিয়াত বাধা দিয়াৰ বাবে চক্রান্ত কৰাৰ তথ্যও চোৰাংচোৱাই লাভ কৰিছিল৷
প্রশাসনে তৎপৰতাৰে সেইবাৰ সংগঠনটোৰ চক্রান্ত ৰোধ কৰিবলৈ সক্ষম হয়৷ কিন্তু পি এফ আয়ে বিভিন্ন সংখ্যালঘু অধু্যষিত এলেকাত নাগৰিকপঞ্জীৰ পৰা নাম বাদ পৰা লোকৰ নাম নাগৰিকপঞ্জীত অন্তর্ভুক্ত কৰিবৰ বাবে বিভিন্ন প্রকাৰে সহায় কৰাৰ তথ্য আৰক্ষীয়ে লাভ কৰে৷ আনকি পি এফ আয়ে গোৱালপাৰা, বৰপেটা আৰু ধুবুৰী জিলাত সংখ্যালঘু অধু্যষিত এলেকাত মুকলিকৈ হেল্প ডেস্ক স্থাপন কৰিছিল৷ ইফালে ‘কা’ আন্দোলনৰ সময়ত হিংসাত্মক ঘটনাৰ আঁৰতো পি এফ আইৰ যথেষ্ট হাত থকাৰ তথ্য চোৰাংচোৱাই লাভ কৰে৷
তাৰেই পৰিপ্রেক্ষিতত গুৱাহাটীত থকা সংগঠনটোৰ ৰাজ্যিক মুখ্য কার্যালয়ত আৰক্ষীয়ে অভিযান চলাইছিল৷ নিজকে গণতান্ত্রিক সংগঠন বুলি দাবী কৰা এই সংগঠনটোৱে ‘কা’ আন্দোলনৰ সময়ত বিভিন্ন স্থানলৈ ফ’ন কৰি সাংকেতিক ভাষাৰে কথা পাতিছিল৷ তেতিয়াই সন্দেহৰ আৱর্তত সোমাই পৰা পি এফ আইৰ মুখ্য কার্যালয়ত আৰক্ষীয়ে অতর্কিত অভিযান চলোৱাৰ সময়ত এটা লেপটপকে ধৰি বিভিন্ন আপত্তিজনক নথি-পত্র জব্দ কৰিছিল৷
লেপটপটো ফৰেনছিক বিজ্ঞানীয়ে পৰীক্ষা কৰাৰ সময়তো বহু আপত্তিজনক তথ্য লাভ কৰিছিল৷ লক্ষণীয়ভাৱে আইনবিৰোধী কাম কৰাৰ বাবে ২০১৯ চনৰ ১৮ ডিচেম্বৰত আৰক্ষীয়ে পি এফ আইৰ ৰাজ্যিক সভাপতি আমিনুল হকক গ্রেপ্তাৰ কৰিছিল৷ ‘কা’ আন্দোলনত হিংসাত্মক কামত জড়িত থকাৰ স্পষ্ট প্রমাণ লাভ কৰাৰ পাছতে তেওঁক গ্রেপ্তাৰ কৰা হৈছিল৷ পি এফ আয়ে আমছুকে ধৰি ইত্তেহাদ ফ্রণ্ট, বি টি এ ডি সংখ্যালঘু ছাত্র সন্থা, অল ইণ্ডিয়া ইছলামিক কাউঞ্চিল আৰু কেম্পাছ ফ্রণ্ট অৱ ইণ্ডিয়া আদি বহুকেইটা সংগঠনৰ সৈতে মিলি অসমত কাম কৰি আছে৷
মৌলবাদী সংগঠনৰ সৈতে জড়িত থকাৰ তথ্যও আৰক্ষীয়ে লাভ কৰিছে৷ লক্ষণীয় যে ধলপুৰৰ গৰুখুঁটিত হোৱা ৰক্তাক্ত পৰিস্থিতিৰ বাবে আমছু, ইত্তেহাদ ফ্রণ্টৰ সৈতে লগ লাগি পি এফ আয়ে উচটনি দিয়াৰ তথ্য ইতিমধ্যে স্পষ্ট হৈছে৷ উচেছদ ৰোধ কৰাৰ নামত লাখ লাখ ধন আত্মসাৎ কৰিও যেতিয়া উচেছদ ৰোধ কৰিবলৈ সক্ষম নহ’ল, তেতিয়া ৰক্তাক্ত পৰিস্থিতিৰে বিষয়টো গাপ দিবৰ বাবে চেষ্টা কৰিছিল৷ কিন্তু গৰুখুঁটি-কাণ্ডৰ মূল অভিযুক্তসকলক ইতিমধ্যে আৰক্ষীয়ে চিনাক্ত কৰি গ্রেপ্তাৰ কৰিবলৈ অভিযান আৰম্ভ কৰিছে৷
