জালুকবাৰী সমষ্টিৰ পাণ্ডু ৪ নং ৱাৰ্ডস্থিত গোলাৱ চন্দ মন্না লাল চৰকাৰী হিন্দী প্ৰাথমিক বিদ্যালয়ত পাব্লিক হেল্থ বিভাগৰ আজৱ কাণ্ড । বিদ্যালয় কৰ্তৃপক্ষৰ অনুমতি অবিহনে বিদ্যালয়ৰ চৌহদ তথা বিদ্যালয়ৰ প্ৰৱেশ দ্বাৰতে পানী যোগানৰ বাবে ৫০০ ফুটৰ বৰিং কৰে বিভাগটোৱে ।
অঞ্চলটোৰ সচেতন মহলৰ মতে ১৯৫১ চনত স্থাপিত চৰকাৰী বিদ্যালয় খনত বৰ্তমানো প্ৰায় ডেৰশ কণ কণ ছাত্ৰ ছাত্ৰীয়ে অধ্যয়ন কৰি আছে । ক’ভিড মহামাৰী আৰু প্ৰশাসনৰ নিৰ্দেশ মৰ্মে বিদ্যালয় খন বৰ্তমান বন্ধ হৈ আছে। এনে সময়তে বিদ্যালয় খনৰ প্ৰৱেশদ্বাৰত এই ঘটনা সংঘটিত কৰিছে বিভাগটোৱে ।
সচেতন মহলৰ অভিযোগ অনুসৰি পানী যোগানৰ বাবে উক্ত ঠাইখিনিত বৈদ্যুতিক মটৰ আদিকে ধৰি অন্যান্য সামগ্ৰী স্থাপন কৰা হ’ব যিয়ে বিদ্যালয় খনৰ চৌহদতো ঠেক কৰাৰ লগতে বিদ্যালয় খনৰ পৰিৱেশো বিনষ্ট কৰিব । তাৰোপৰি বিদ্যালয় খোলাৰ পিছত যিকোনো দুৰ্ঘটনা সংঘটিত হোৱাৰ আশংকা আছে ।
বিদ্যালয় খনৰ প্ৰধান শিক্ষয়ত্ৰী চোৱালা বড়ো আৰু পৰিচালনা সমিতিৰ সভাপতি আশা দেৱীয়ে ঘটনা সন্দৰ্ভত তেওঁলোকৰ পৰা কোনোৱে অনুমতি লোৱা নাই বুলি প্ৰকাশ কৰে।
আনহাতে সচেতন মহলে ঘটনা সন্দৰ্ভত শিক্ষা বিভাগক ব্যৱস্থা গ্ৰহণ কৰাৰ বাবে অনুৰোধ জনায়।