২০২২ ৰ পিছত কৰ্টত নাথাকিব ছানিয়া

ভাৰতৰ মহিলা টেনিছ খেলুৱৈ ছানিয়া মিৰ্জাই অলপতে অৱসৰ ঘোষণা কৰে। ২০২২ বৰ্ষৰ অন্তত সকলো ধৰণৰ টেনিছ খেলৰ পৰা অৱসৰ গ্ৰহণৰ কথা ঘোষণা কৰে তাৰকা টেনিছ খেলুৱৈগৰাকীয়ে। ৩৫ বছৰীয়া ছানিয়া মিৰ্জাই তেওঁৰ দ্বৈত সংগী নাদিয়া কিচেনোকৰ সৈতে অষ্ট্ৰেলিয়ান অপেন ২০২২ ৰ পৰা বাহিৰ হোৱাৰ পিছতে অৱসৰৰ কথা ঘোষণা কৰে। অষ্ট্ৰেলিয়ান অ’পেনৰ মহিলাৰ দ্বৈত শাখাত প্ৰথম ৰাউণ্ডতে পৰাস্ত হয় ছানিয়া মিৰ্জা আৰু নাদিয়া। ডাবলছত প্ৰাক্তন বিশ্বৰ এক নম্বৰ খেলুৱৈগৰাকীয়ে ২০০৫ চনত হায়দৰাবাদত মহিলা টেনিছ এছ’চিয়েচন (ডব্লিউটিএ) একক খিতাপ জয় কৰা প্ৰথম ভাৰতীয় হিচাপে ইতিহাস ৰচনা কৰিছিল। ছানিয়াই সকলো বহু-ক্ৰীড়া প্ৰতিযোগিতাত ১৪ টা পদক জিকিছে। তেওঁ মহিলা আৰু মিক্সড ডাবলছ দুয়োটা শ্ৰেণীতে এছিয়ান গেমছৰ বিভিন্ন সংস্কৰণত সাতটা পদক জিকিছে। মিৰ্জাই ২০১০ চনত দিল্লীত অনুষ্ঠিত কমনৱেলথ গেমছত মহিলাৰ একক ৰূপৰ পদক আৰু মহিলাৰ দ্বৈত ব্ৰঞ্জৰ পদকো লাভ কৰিছিল। ছানিয়া হৈছে ডাবলছত বিশ্বৰ এক নম্বৰ প্ৰাক্তন আৰু এককত কেৰিয়াৰৰ সৰ্বশ্ৰেষ্ঠ ৰেংকিং আছিল ২৭। ছানিয়া বৰ্তমান বিশ্বৰ ৬৮ সংখ্যক স্থানত আছে। মহিলা টেনিছ সংস্থা (ডব্লিউটিএ)ৰ মতে তেওঁৰ কেৰিয়াৰৰ মুঠ পুৰষ্কাৰৰ ধন এতিয়ালৈকে ৭,০৩০,৯৯৭ ডলাৰ (প্ৰায় ₹৫৩ কোটি)।
ছানিয়াই অৱসৰ ঘোষণা কৰি কয় “যিহেতু মোৰ বয়স হৈছে সেইবাবে মই সুস্থ হৈ উঠাত বহুত সময় লাগে। মই ভাবো মোৰ শৰীৰ এতিয়া সম্পূৰ্ণ ফিট হৈ থকা নাই, মাতৃ হিচাপে এতিয়া মই মোৰ দায়িত্ব পালন কৰি যাব বিচাৰোঁ।” উল্লেখ্য যে ২০১০ চনত পাকিস্তানী ক্ৰিকেটাৰ ছোৱেইব মালিকৰ সৈতে বিবাহপাশত আৱদ্ধ হৈছিল ছানিয়া। ২০১৮ চনত এটি পুত্ৰ সন্তানৰ মাতৃ হয় ভাৰতৰ তাৰকা টেনিছ খেলুৱৈগৰাকী।