গুৱাহাটী মহানগৰীৰ বৰ্জিত লেতেৰা পানীভাগ দীপৰ বিলত পেলাই অহাৰ ফলত বিলখন ভয়াবহ ভাবে প্ৰদূষিত হৈ পৰিছে। তদুপৰি গুৱাহাটী পৌৰ নিগমে দীপৰ বিলৰ পাৰত ডাম্পিং গ্ৰাউণ্ড স্থাপন কৰাৰ পিছৰে পৰাই বিলখনৰ মাছ-কাছকে ধৰি বিবিধ প্ৰজাতিৰ জলজ উদ্ভিদ ক্ৰমাৎ নিঃশেষ হ’বলৈ ধৰিছে। উল্লেখ্য যে পুৰাতন কালৰে পৰাই ঐতিহাসিক দীপৰ বিলত মাছ মাৰি জীৱিকা নিৰ্বাহ কৰি অহা বৃহত্তৰ আজাৰা অঞ্চলৰ প্ৰায় ৮২৫ টা অনুসূচীত সম্প্ৰদায়ৰ মাছমৰীয়া পৰিয়ালৰ ক্ষেত্ৰত ৰাজ্য চৰকাৰে কোনো কোনো সংস্থাপনৰ ব্যৱস্থা গ্ৰহণ নকৰাৰ লগতে কোনো প্ৰত্যক্ষ আঁচনি গ্ৰহণ নকৰিলে। ইপিনে বিশ্বৰ পক্ষী অভয়াৰণ্যৰ মানচিত্ৰত স্থান লাভ কৰিবলৈ সক্ষম হোৱা ঐতিহাসিক দীপৰ বিলখন ভয়াবহ ভাবে প্ৰদূষিত হৈ পৰাত দেশী বিদেশী পৰিভ্ৰমী চৰাইৰ সংখ্যাও পূৰ্বৰ তুলনাত যথেষ্ট কমি গৈছে।
ক্ৰমাৎ কমি আহিছে দীপৰ বিলৰ মাছ-কাছৰ সংখ্যা। ইয়াৰ মাজতে প্ৰতিবছৰে দীপৰ বিল পাঁচপাৰা সমবায় সমিতিখনে বিলখনত বিবিধ প্ৰজাতিৰ মাছৰ পোনা এৰি দি আহিছে। এইবাৰো দীপৰ বিল পাঁচপাৰা সমবায় সমিতিয়ে দীপৰ বিলত প্ৰায় ৫০ হেজাৰ বিবিধ থলুৱা প্ৰজাতিৰ মাছৰ পোনা এৰি দিয়ে। সমবায় সমিতিখনৰ উপদেষ্টা নীৰেন চন্দ্ৰ দাসকে ধৰি সমিতিৰ কেবাজনো কৰ্মকৰ্তা, দীপৰ বিল সুৰক্ষা মঞ্চৰ সাধাৰণ সম্পাদক প্ৰমোদ কলিতা , সহকাৰী সাধাৰণ সম্পাদক সুশীল টেৰণকে ধৰি মঞ্চৰ কেবাজনো কৰ্মকৰ্তাৰ উপস্থিতিত ঐতিহাসিক শ্ৰী শ্ৰী ভাঙাৰা গোঁসাই মন্দিৰৰ ওচৰত থকা দীপৰ বিলৰ ঘাটত মাছৰ পোনা এৰি দিয়ে ।
