চৰাইদেউ জিলাৰ অন্তৰ্গত ৰাষ্ট্রীয় ঘাইপথ, ৰাজ্যিক ঘাইপথ আৰু অন্যান্য বাট-পথ সমূহত গৰাকীবিহীনভাৱে অবাধে গৰু বিচৰণ কৰাৰ ফলশ্ৰুতিত হ’ব পৰা সম্ভাব্য দুৰ্ঘটনা ৰোধ কৰাৰ লক্ষ্যৰে তথা এই সমস্যাৰ ফলপ্ৰসূ সমাধান বিচৰাৰ উদ্দেশ্যে আজি চৰাইদেউ জিলাৰ উপায়ুক্ত পল বৰুৱাৰ অধ্যক্ষতাত উপায়ুক্ত কাৰ্যালয়ৰ সভাকক্ষত এখন গুৰুত্বপূৰ্ণ বৈঠক অনুষ্ঠিত হয়। বৈঠকত সংশ্লিষ্ট বিভাগসমূহৰ সৈতে আলোচনামৰ্মে ভালেকেইটা গুৰুত্বপূৰ্ণ সিদ্ধান্ত গ্ৰহণ কৰা হয়। ৰাষ্ট্ৰীয় আৰু ৰাজ্যিক ঘাইপথৰ কাষৰ পঞ্চায়ত সমূহত একোটাকৈ পাউণ্ড খুলি ৰাস্তাত চৰি থকা গৰুসমূহ ৰখাৰ ব্যৱস্থা গ্ৰহণ কৰিবলৈ কোৱা হয় যাতে পৰৱৰ্তী পৰ্যায়ত এই গৰুসমূহ নিলাম কৰাৰ ব্যৱস্থা কৰিব পাৰি। উপায়ুক্ত গৰাকীয়ে পশুপালন বিভাগৰ সৈতে মিলি পঞ্চায়ত সমূহক ৰাস্তাত চৰি থকা গৰুসমূহৰ গৰাকীসকলক চিনাক্তকৰণ কৰিবলৈ কয়।
উল্লেখ্য যে, সোণাৰি আৰু মৰাণ পৌৰসভাৰ পৌৰপতি দুয়োগৰাকীয়ে নিজ নিজ পৌৰসভা এলেকাত বিষয়ে ৰাজহুৱা ঘোষণা কৰোৱাৰ ব্যৱস্থা কৰিব, যাতে গৰুৰ গৰাকীসকলে অতি সোনকালে নিজ নিজ গৰু নিজৰ জিম্মাত লয়, অন্যথা তেওঁলোকৰ বিৰুদ্ধে আইনগত ব্যৱস্থা গ্ৰহণ কৰিব। ইয়াৰ লগতে গৰাকীসকলে জৰিমনাও ভৰিব লাগিব। জিলা প্ৰশাসনে জিলা তথ্য আৰু জনসংযোগ বিভাগৰ সহযোগত ৰাষ্ট্ৰীয় আৰু ৰাজ্যিক ঘাইপথত গৰুৰ বিচৰণৰ বিৰুদ্ধে ৰাজহুৱা ঘোষণা কৰাৰ ব্যৱস্থা গ্ৰহণ কৰিব।
উল্লেখযোগ্য যে, পথত গৰুৰ বিচৰণৰ বিৰুদ্ধে চৰাইদেউ জিলা প্ৰশাসনে জিলা আৰক্ষী বিভাগ, পৌৰসভা, পৰিবহন বিভাগ আৰু জিলা পশুপালন বিভাগৰ সহযোগত জিলাখনত সোনকালে এক বিশেষ অভিযান আৰম্ভ কৰিব। এই অভিযানত নিশা ৰাস্তাত বিচৰণ কৰা গৰুসমূহক ট্ৰাকত উঠাই নাজিৰা বা যোৰহাটৰ গৌশালাত আলোচনামৰ্মে ৰখাৰ ব্যৱস্থা গ্ৰহণ কৰিব। মঙলবাৰৰ বৈঠকত অতিৰিক্ত উপায়ুক্ত দ্বয় জাবেদ আৰমান আৰু অভিজিত গগৈ, অতিৰিক্ত আৰক্ষী অধীক্ষক সবিতা দাস, সোণাৰি পৌৰসভাৰ পৌৰপতি তিলক চন্দ্ৰ নেওগ, মৰাণ পৌৰসভাৰ পৌৰপতি অৰূপ দত্ত, জিলা পৰিবহন বিষয়া ৰাজীৱ চন্দ্ৰ বৰদলৈ আৰু মহকুমা পশুপালন তথা পশু চিকিৎসা বিষয়া প্ৰণৱজ্যোতি বড়া উপস্থিত থাকে।
