ৰাজ্যৰ বিভিন্ন বিদ্যালয়ত ঠিকাভিত্তিক শিক্ষকতা কৰি থকাসকলৰ চাকৰি নিয়মীয়া কৰিব নোৱাৰি বুলি স্পষ্ট কৰি দিছে ৰাজ্যৰ শিক্ষা মন্ত্রী ৰণোজ পেগুৱে৷ ঠিকা-ভিত্তিক শিক্ষকতা কৰি অহা শিক্ষকসকলৰ চাকৰি নিয়মীয়া কৰাৰ ক্ষেত্রত আইনী বাধা আছে৷ লগতে তেওঁ কয় যে, বৰ্তমানৰ ৰাজ্য চৰকাৰখনে ঠিকাভিত্তিক শিক্ষকসকলক নিয়মীয়া শিক্ষকসকলৰ সমহাৰত বেতন দি আহিছে। আনহাতে, ঠিকাভিত্তিক কর্মৰত শিক্ষকসকলক পাঁচ শতাংশ ডি এ (মৰগীয়া বানচ) এক জানুৱীৰৰ পৰা প্রযোজ্য হোৱাকৈ প্রদান কৰা হ’ব বুলিও মন্ত্রীজনে জানিবলৈ দিয়ে।
উল্লেখ্য যে, ৰাজ্যৰ ঠিকাভিত্তিক কাম কৰি থকা শিক্ষকসকলে তেওঁলোকৰ চাকৰি নিয়মীয়া কৰাৰ বাবে দীর্ঘদিন ধৰি আন্দোলন কৰি আহিছে যদিও ৰাজ্য চৰকাৰখনে শিক্ষকসকলৰ উক্ত দাবীক বিশেষ গুৰুত্ব দিয়া নাই৷
এনে পৰিস্থিতিৰ মাজতে আজি শিক্ষা মন্ত্রীজনে আইনী বাধাৰ বাবেই ঠিকাভিত্তিক শিক্ষকসকলৰ চাকৰি নিয়মীয়া কৰিব পৰা নাযাব বুলি কৰা মন্তব্য বিশেষ তাৎপৰ্যপূৰ্ণ হৈ পৰিছে৷ মন্ত্রীজনৰ এই মন্তব্যৰ পাছত এতিয়া ঠিকাভিত্তিক শিক্ষকসকলে কি পদক্ষেপ গ্রহণ কৰিব সেয়া হ’ব লক্ষণীয়৷