গ্ৰন্থপ্ৰেমীৰ বাবে আহিছে এক দুঃখবৰ। স্থগিত কৰা হ’ল বিশ্ব গ্ৰন্থমেলা। দেশত বৰ্ধিত কোৰোনা আৰু কোৰোনাৰ নতুন প্ৰকাৰ অমিক্ৰনৰ সংক্ৰমণ বৃদ্ধি পোৱাৰ পৰিপ্ৰেক্ষিতত স্থগিত ৰখা হৈছে গ্ৰন্থমেলা। নতুন দিল্লীত অনুষ্ঠিত হ’বলগীয়া ৩০ সংখ্যক বিশ্ব গ্ৰন্থমেলাৰ আয়োজকসকলে গ্ৰহণ কৰিছে এই গুৰুত্বপূৰ্ণ সিদ্ধান্ত। দিল্লীৰ প্ৰগতি মৈদানত ৮ জানুৱাৰীৰ পৰা ১৬ জানুৱাৰীলৈ অনুষ্ঠিত হোৱাৰ কথা আছিল। ১৯৭২ চনত প্ৰথম বাৰৰ বাবে অনুষ্ঠিত হোৱা এই বিশ্ব গ্ৰন্থমেলাৰ এইবাৰ আছিল সোণালী জয়ন্তী বৰ্ষ। গ্ৰন্থমেলাখন পুনৰ কেতিয়া অনুষ্ঠিত হ’ব সেই বিষয়ে পৰৱৰ্তী সময়ত ৰাজহুৱা কৰা হ’ব বুলি আয়োজকসকলে জানিবলৈ দিছে।