কিছুদিন পূৰ্বে ভাৰত – চীন আন্তঃৰাষ্ট্ৰীয় সীমান্তৰ সমীপৰ টাৱাঙত অনুপ্ৰৱেশকাৰী পিপুলছ লিবাৰেচন আৰ্মীৰূপী (পি এল এ) চীনা সৈন্যক ভাৰতীয় সেনাই যোগ্য প্ৰত্যুত্তৰ দি খেদি পঠিওৱাৰ পাছত ভাৰত চৰকাৰে অৰুণাচল প্ৰদেশৰ চীন সীমান্তৰ ক্ষিপ্ৰ যাতায়ত তথা যোগাযোগ ব্যৱস্থাটোৰ উন্নতি সাধন কৰা বিষয়টোক অতি গুৰুত্ব সহকাৰে গ্ৰহণ কৰিছে। আনকি প্ৰায় ডেৰমাহ পূৰ্বে কেন্দ্ৰীয় পথ পৰিবহণ আৰু ৰাষ্ট্রীয় ঘাইপথ মন্ত্ৰী নীতিন গাডকাৰীয়েও গুৱাহাটীলৈ কেইবাটাও চৰকাৰী কাৰ্যসূচীলৈ আহোঁতে অৰুণাচল প্ৰদেশত পথ যাতায়ত ব্যৱস্থাৰ উন্নতি সাধনৰ বাবে প্ৰায় ৫৫ হাজাৰ কৌটি টকা বিনিয়োগ কৰা হব বুলি ঘোষণা কৰিছিল। ইয়াৰ ভিতৰত নতুনকৈ নিৰ্মাণ কৰিবলগীয়া গুৰুত্বপূৰ্ণ পথটো আছিল ১,৮৫৯ কিলোমিটাৰ দৈৰ্ঘ্যৰ ফ্ৰন্টিয়াৰ হাইৱে। টাৱাং সীমান্তৰ সমীপৰ নাফ্ৰাৰ পৰা বহু দুৰ্গম পৰ্বত, গভীৰ সেউজ বনাঞ্চলৰ মাজৰে ট্ৰাই জংচন হিচাপে পৰিচিত (ভাৰত – চীন – ম্যানমাৰ) বিজয়নগৰলৈ নিৰ্মাণ কৰা হ’ব।
আনহাতে নতুন ফ্ৰণ্টিয়াৰ হাইৱেটো ৰাষ্ট্রীয় ঘাইপথ প্ৰাধিকৰণ, ৰাষ্ট্ৰীয় ঘাইপথ আন্তঃগাঁঠনি উন্নয়ন নিগম লিমিটেড (NIDCL) আৰু প্ৰতিৰক্ষা মন্ত্ৰণালয়ৰ অধীনৰ সীমান্ত পথ সংস্থাই (BRO) যৌথভাবে নিৰ্মাণ কৰিব বুলি কেন্দ্ৰীয় মন্ত্ৰী নীতিন গাডকাৰীয়ে ঘোষণা কৰিছিল। কিন্তু সেই সময়ত গাডকাৰীয়ে প্ৰস্তাৱিত ফ্ৰণ্টিয়াৰ হাইৱেটোৰ নিৰ্মাণৰ কাম কেতিয়া আৰম্ভ কৰি কেতিয়া সম্পূৰ্ণ কৰিব তাক ঘোষণা কৰা নাছিল। কিন্তু টাৱাঙত সংঘটিত শেহতীয়া ঘটনাৱলীয়ে ফ্ৰণ্টিয়াৰ হাইৱেৰ নিৰ্মাণৰ কাম শীঘ্ৰে আৰম্ভ হোৱাটো প্ৰায় নিশ্চিত কৰিছে সামৰিক দিশৰ বাবে গুৰুত্বপূৰ্ণ আৰু কৌশলগত প্ৰকল্প হিচাপে বিবেচিত প্ৰকল্পটোৰ নিৰ্মাণকার্য এতিয়া ক্ষিপ্ৰতাৰে হব বুলি জানিব পৰা গৈছে। ইতিমধ্যে এই প্ৰকল্পটোৰ কাম নিৰ্দিষ্ট কিছু অঞ্চলত আৰম্ভ কৰা হৈছে আৰু থলুৱাভাৱে উৎপাদিত সামগ্ৰী এই আন্তঃগাঁথনি নিৰ্মাণৰ বাবে সৰবৰাহ কৰা হৈছে। বিগত সময়ত চীনে তীব্র আপত্তি কৰা সত্ত্বেও নতুন দিল্লীয়ে চুবুৰীয়া ৰাষ্ট্ৰখনৰ আপত্তিক আওকাণ কৰি মেকমোহন লাইনক অনুকৰণ কৰি এল এ চিৰ সমীপতে ১,৮৫৯ কিলোমিটাৰ দৈৰ্ঘ্যৰ ঘাইপথটো নিৰ্মাণ কৰা হ’ব। নাফ্ৰাৰ মেগ’ৰ পৰা আৰম্ভ হৈ টাৱাং, আপাৰ সোৱণশিৰি, টুটিং, মেছুকা, আপাৰ চিয়াং, দেবাং ভেলী, ডেছালি, চাগলাগাম, কিবিথু, ডং হৈ বিজয়নগৰত পথটো সমাপ্ত হ’ব।
অৰুণাচল প্ৰদেশৰ প্ৰকৃত নিয়ন্ত্ৰণ ৰেখা (এল এ চি ) সংলগ্ন এই বৃহত্তম আৰু কঠিনতম প্ৰকল্পৰ বাবে কেন্দ্ৰীয় চৰকাৰে ৪০ হাজাৰ কোটি টকা ব্যয় কৰিব। টাৱাং ঘটনাৰ পাছত ৰাষ্ট্ৰীয় ঘাইপথ প্ৰাধিকৰণে প্ৰকল্পটো পাঁচ বছৰৰ ভিতৰত নিৰ্মাণ সম্পূৰ্ণ কৰাৰ বাবে লক্ষ্য নিৰ্ধাৰণ কৰিছে । এই প্ৰকল্পত অৰুণাচল প্রদেশে তিনিটা ৰাষ্ট্ৰীয় ঘাইপথ লাভ কৰিব। ইয়াৰ ভিতৰত অৰুণাচল সীমান্ত ঘাইপথ, ট্ৰেন্স অৰুণাচল ঘাইপথ আৰু পূব- পশ্চিম ঔদ্যোগিক কৰিড’ৰ ঘাইপথ। সীমান্ত অঞ্চললৈ দ্রুতগতিত যান-বাহনৰ যাতায়াতৰ বাবে মূল ঘাইপথটো সংলগ্ন কৰিবলৈ ৬টা আন্তঃঘাইপথ কৰিড’ৰ নিৰ্মাণ কৰা হ’ব। এই ঘাইপথকেইটাৰ মুঠ দৈৰ্ঘ্য হ’ব ২,১৭৮ কিলোমিটাৰ । লক্ষনীয়ভাবে এই প্ৰকল্পৰ পৰা অসমো বহুখিনী লাভাম্বিত হব। তাৰ ভিতৰত সংলগ্ন কৰিড’ৰ এটা হৈছে অসমৰ শোণিতপুৰ জিলাৰ ঠেলামৰা-টাৱাং-নেলীয়া ঘাইপথ। যাৰ দৈৰ্ঘ্য হব ৪০২ কিলোমিটাৰ। তেনেদৰে ৩৯১ কিলোমিটাৰ দৈৰ্ঘ্যৰ ইটাখোলা-পাকে-কেচাং-চেপা-পাৰচিপালো ঘাইপথ, ২৮৫ কিলোমিটাৰ দৈৰ্ঘ্যৰ গোগামুখ-টালিহা- টাটো ঘাইপথ, ৩৯৮ কিলোমিটাৰ দৈৰ্ঘ্যৰ আকাজান -জৰগিং-পাংগো ঘাইপথ, ২৯৮ কিলোমিটাৰ দৈৰ্ঘ্যৰ পাছিঘাট-বিচিং ঘাইপথ আৰু ৪০৪ কিলোমিটাৰ দৈৰ্ঘ্যৰ কানুবাৰী-লংডিং ঘাইপথ।
প্ৰাপ্ত খবৰ মতে অৰুণাচল সীমান্ত ঘাইপথটোৰে সামৰিক বাহিনীৰ জোৱানৰ লগতে যুদ্ধাস্ত্ৰ কঢ়িয়াব পৰা বৃহৎ ক্ষমতাসম্পন্ন হ’ব। যাতে সামগ্রী অনায়াসে এই পথটোৰে কঢ়িয়াব পৰা যাব। প্রয়োজন সাপেক্ষে এই ঘাইপথত অধিক সেনা মোতায়েন কৰাৰো ক্ষমতা থাকিব। উল্লেখ্য যে ২০১৪ চনত তদানীন্তন গৃহ ৰাজ্যিক মন্ত্ৰী আৰু বৰ্তমানৰ কেন্দ্ৰীয় আইন মন্ত্রী কিৰেণ ৰিজিজুৱে এই বৃহত্তম আৰু কঠিনতম প্ৰস্তাৱিত প্ৰকল্পটো আগবঢ়াইছিল। সেই চনতে গৃহ মন্ত্ৰালয়ে প্ৰকল্পটোৰ ওপৰত গুৰুত্ব দি কেন্দ্ৰীয় পথ পৰিবহণ আৰু ঘাইপথ মন্ত্ৰালয়ক বিতং প্রকল্প প্রতিবেদন দাখিল কৰিবলৈ নিৰ্দেশ দিছিল। সেই সময়ত পৰিকল্পনা কৰা অৰুণাচল সীমান্ত ঘাইপথ সন্দৰ্ভত সেই সময়তে চীনে তীব্র আপত্তি দর্শাইছিল। সীমা বিবাদ সমাধান নোহোৱালৈকে নতুন দিল্লীক তেনে প্রকল্প কাৰ্যকৰী নকৰিবলৈ চীনে একপ্ৰকাৰ সকীয়নি দিছিল যদিও কেন্দ্ৰীয় চৰকাৰে সেই সকীয়নিক আওকাণ কৰি প্ৰকল্পটো আগবঢ়াই নিয়াৰ সিদ্ধান্ত গ্ৰহণ কৰিছিল আৰু সম্প্ৰতি এই প্ৰকল্পটো নিৰ্মাণৰ বাবে প্ৰস্তুতি সম্পূৰ্ণ কৰি তুলিছে। কেন্দ্ৰীয় পথ পৰিবহণ আৰু ঘাইপথ মন্ত্ৰালয়, সীমান্ত পথ সংস্থা আৰু কেইবাটাও সংস্থাৰ সমন্বয়ত এই প্ৰকল্পটো নিৰ্মাণ কৰা হ’ব আৰু তাৰ বাবেই প্ৰস্তুতি আৰম্ভ হৈছে। জানিব পৰা মতে পথছোৱাৰ নিৰ্মাণ কাৰ্যত সীমান্ত পথ সংস্থাই গুৰুত্বপূৰ্ণ ভূমিকা পালন কৰিব। চীনৰ আগ্ৰাসনৰ পৰিপ্ৰেক্ষিতত চৰকাৰে এতিয়া ২০২৬ -২৭ চনৰ ভিতৰত ফ্ৰন্টিয়াৰ হাইৱেৰ নিৰ্মাণ কার্য সম্পূর্ণ কৰাৰ বাবে তৎপৰতা আৰম্ভ কৰিছে। আনকি সীমান্ত পথ সংস্থাৰ গুৱাহাটীস্থিত পূব মণ্ডলৰ অতিৰিক্ত সঞ্চালক প্ৰধান প্ৰবীণ কুমাৰ হনুমন্ত সিঙে বিগত দিনকেইটাত ফ্ৰণ্টিয়াৰ হাইৱেটো পাৰ হৈ যাবলগীয়া আৰু সামৰিক দিশৰ পৰা গুৰুত্বপূৰ্ণ কেবাটাও অঞ্চল সঘনাই পৰিদৰ্শন কৰি আছে বুলি জানিব পৰা গৈছে।
