ৰাষ্ট্ৰীয় কংগ্ৰেছ দলৰ ভাৰত জোড়ো যাত্ৰাই যোৱা ৭ ছেপ্তেম্বৰৰ পৰা আজি ১০০ দিন অতিক্ৰম কৰিলে। কন্যাকুমাৰীৰ পৰা কাশ্মীৰলৈ ১৪ খন ৰাজ্যৰ ১৫০ দিনৰ ৩৫০০ কিলোমিটাৰ ভাৰত জড়ো যাত্ৰাৰ নেতৃত্ব দিছে কংগ্ৰেছ দলৰ নেতা ৰাহুল গান্ধীয়ে। এই যাত্ৰাত ৰাহুল গান্ধীৰ লগত ১১৯ জনীয়া টীমত ভাৰত যাত্ৰী হিচাবে যাত্ৰা কৰি আছে বৰঝাৰ বিমান বন্দৰৰ সমীপৰ তথা পলাশবাৰী সমষ্টিৰ বিকাশ নাথ যোগীয়ে। অসম ৰাজ্যিক এন.এছ.ইউ.আইৰ উপ-সভাপতি বিকাশ নাথ যোগীয়ে ৰাহুল গান্ধীৰ সৈতে ভাৰত জোড়ো যাত্ৰাত দক্ষিণ ভাৰতৰ পৰা উত্তৰ ভাৰতলৈ ৮ ৰাজ্যৰ ৪৩ খন জিলাত প্ৰায় ২৮৫০ কিলোমিটাৰ খোজ কাঢ়িলে।
ভাৰত জোড়ো যাত্ৰাই তামিলনাডুৰ কন্যাকুমাৰীৰ পৰা আৰম্ভ কৰি কেৰেলা, কৰ্ণাটক অন্ধ্ৰপ্ৰদেশ, তেলেংগানা, মহাৰাষ্ট্ৰ, মধ্যপ্ৰদেশৰ পিছত আজি ৰাজস্থানৰ জয়পুৰত প্ৰৱেশ কৰিছে। ৰাহুল গান্ধীৰ লগত লাখ লাখ মানুহে এই যাত্ৰাত সংগ দিছে। প্ৰাক্তন সৈনিক, অভিনেত্ৰী পূজা ভট্ট, প্ৰাক্তন ক্ৰিকেটাৰ আজাহৰ উদ্দিন, প্ৰখ্যাত অভিনেতা আৰু চলচ্চিত্ৰ পৰিচালক অমল পালেকৰ, ৰিজাৰ্ভ বেংকৰ প্ৰাক্তন গভৰ্ণৰ ৰঘুৰাম ৰাজনৰ দৰে বহু চিনাকি ব্যক্তিয়ে ৰাহুল গান্ধীক যাত্ৰাত সংগ দিয়ে। এই যাত্ৰাত ৰাহুল গান্ধীৰ সৈতে খোজত খোজ মিলাই আগবাঢ়ি গৈছে অসমৰ বিকাশ নাথ যোগীয়ে। অহা বছৰৰ ২৬ জানুৱাৰীত কাশ্মীৰত ভাৰত জড়ো যাত্ৰাৰ সামৰণি পৰিব।
এই যাত্ৰাত ৰাহুল গান্ধীৰ সৈতে অংশীদাৰ হোৱাত বিকাশ নাথ যোগীক শুভেচ্ছা জনাইছে বিধান সভাৰ বিৰোধী দলপতি দেৱব্ৰত শইকীয়া, প্ৰদেশ কংগ্ৰেছৰ সভাপতি ভূপেন বৰা, উপ-সভাপতি নৱজ্যোতি তালুকদাৰ, সাংসদ গৌৰৱ গগৈ, প্ৰদ্যুৎ বৰদলৈ, বিধায়ক ৰেকিবুদ্দিন আহমেদ, মহিলা কংগ্ৰেছৰ সভানেত্ৰী মীৰা বৰঠাকুৰ, অসম ৰাজ্যিক NSUIৰ সভাপতি কৃষাণু বৰুৱা আৰু NSUIৰ সাধাৰণ সম্পাদক তথা উত্তৰ-পূৰ্বাঞ্চল NSUIৰ তত্বাৱধায়ক অনুশেষ শৰ্মাই।
